Rhoi adborth ar y tudalen hon

Beth yw ymchwiliad amddiffyn plentyn?

Mae ymchwiliad amddiffyn plentyn yn ymchwiliad mwy ffurfiol sy'n digwydd os cadarnheir bod plentyn mewn perygl. Gall gynnwys y canlynol:

Casglu gwybodaeth
Bydd gweithiwr cymdeithasol yn siarad â staff proffesiynol a phobl sydd eisoes yn gweithio gyda'r teulu megis ymwelydd iechyd, athrawon neu feddyg.

Caniatâd gan y rhieni
Byddwn yn gofyn am ganiatâd gan y rhieni neu'r gofalwyr (a, lle'n briodol, gan y plentyn) er mwyn cynnal unrhyw archwiliad neu gyfweliad. Yn y rhan fwyaf o achosion rydym yn gwahodd y rhieni neu'r gofalwyr i ddod i'r archwiliad gyda'r plentyn. Os nad yw'r rhieni neu'r gofalwyr yn rhoi caniatâd, efallai y byddwn yn gofyn am orchymyn cyfreithiol a fydd yn caniatáu i ni gyfweld, neu archwilio'r plentyn yn feddygol heb ganiatâd y rhieni, gan fod gennym ddyletswydd i ystyried diogelwch y plentyn.

Cyfweld plentyn
Medrwn gyfweld plentyn yn y cartref, yr ysgol neu mewn un o'n swyddfeydd. Mae'r gweithwyr cymdeithasol a'r heddweision sy'n siarad â phlant yn meddu ar sgiliau gwrando ar blant, a'u helpu ymdopi gyda'r cyfweliad. Os ydym yn amau bod trosedd wedi digwydd, efallai y byddwn yn recordio'r cyfweliad ar dâp fidio fel nad oes yn rhaid i'r plentyn ail-fyw'r profiad os aiff yr achos i'r llys. Os teimlir bod unrhyw blant eraill yn y teulu hefyd mewn perygl, byddwn yn eu cyfweld hwy hefyd.

Archwiliad Meddygol
Mewn rhai ymchwiliadau, bydd angen archwilio’r plentyn i chwilio am anghenion iechyd a meddygol sydd efallai wedi eu methu, ac am dystiolaeth bosibl o niwed. Bydd hyn ond yn cael ei wneud os ystyrir bod hyn er budd y plentyn, gan feddyg sydd wedi ei hyfforddi mewn amddiffyn plant.

Troseddau
Os ydym yn amau trosedd, gall yr heddlu restio a chyfweld pobl os amheuir eu bod yn achosi niwed i blentyn

Ar ddiwedd yr ymchwiliad
Byddwn, gyda help y rhieni neu'r gofalwyr, yn ceisio penderfynu os yw’r plentyn mewn perygl ac angen ei amddiffyn. Os oes, byddwn yn ystyried pa gefnogaeth sydd ei angen i gadw'r plentyn yn ddiogel rhag unrhyw niwed. Os teimlir bod angen cynllun eglur i amddiffyn y plentyn, byddwn yn trefnu cynhadledd amddiffyn plentyn.