Rhoi adborth ar y tudalen hon

C. Sut mae’r gwerth ardrethol yn cael ei gyfrifo?  

A. Mae’r gwerth ardrethol yn adlewyrchu’r rhent uchafswm y byddai tenant yn barod i’w dalu i rentu eiddo dan amodau marchnad perffaith.  Yn arferol, penderfynir ar hyn drwy ddadansoddi tystiolaeth rhenti o eiddo o faint a natur tebyg yn yr ardal.  Y Swyddfa Brisio sy’n penderfynu ar brisiant a rhaid cyflwyno unrhyw apêl yn uniongyrchol i’w swyddfa yn: Swyddfa Brisio Wrecsam, Ty’r Rhaglaw, Stryd y Rhaglaw, Wrecsam, LL11 1PR (Rhif ffôn: 01978 200000)

C. Rwyf wedi apelio yn erbyn fy ngwerth ardrethol - ydw i’n dal i orfod talu? 

A. Ydych.  Mae ardrethi’n daladwy wedi eu seilio ar y gwerth ardrethol sy’n ymddangos yn y Rhestr Drethu gyfredol ac os nad ydych yn talu’r hyn a ddangosir ar eich bil, bydd yn ofynnol cymryd camau gweithredu pellach, hyd yn oed os ydych yn aros am apêl.  Os yw eich apêl yn llwyddiannus a bod eich ardrethi yn cael eu lleihau, mae llog yn daladwy fel arfer ar unrhyw ordaliad. 

 
C. Pa wasanaethau ydw i’n eu derbyn am dalu fy Ardrethi Busnes? 

A. Nid tâl am wasanaethau penodol yw eich ardrethi ond cyfraniad gan fusnesau tuag at yr holl wasanaethau a ddarperir gan y Cyngor i’r gymuned, megis cludiant lleol, addysg a thai, gyda phob un ohonynt o fudd anuniongyrchol i fusnesau yn yr ardal. 

 
C. Pam ydych chi wedi anfon bil ataf i pan rwyf eisoes yn talu rhent yn cynnwys ardrethi i’m landlord? 

A. Dan ddeddfwriaeth Trethu, mae’n rhaid i ni gyflwyno bil i’r sawl y mae’r eiddo yn ei feddiant er gwaethaf unrhyw gytundeb a all fodoli rhwng y meddiannwr a’r landlord.  Efallai y byddwch yn dymuno cysylltu â’ch landlord i drefnu iddo ef/iddi hi dalu’r hyn sy’n ddyledus yn uniongyrchol i’r swyddfa hon ar eich rhan, neu aildrafod y cytundeb rhent i gael gwared o’r elfen ardrethi.  Fodd bynnag, os nad yw’r cyfrif yn cael ei dalu’n rheolaidd, bydd yn rhaid gweithredu yn eich erbyn chi, ac nid eich landlord, oherwydd chi yw’r sawl sy’n atebol. 

C. Rwyf wedi symud allan o’m eiddo busnes - fydda’ i’n gorfod dal i dalu ardrethi?

A. Ni fydd unrhyw ardrethi’n daladwy am y 3 mis cyntaf ond, os yw’r eiddo’n parhau’n wag ar ôl y cyfnod hwn ac rydych yn parhau i fod yn berchennog neu brydlesydd yr eiddo, yna byddwch yn atebol i dalu ardrethi hafal i 50% o’r ardrethi llawn, oni bai bod yr eiddo yn eithredig o Ardrethi Eiddo Gwag. 

C. Pryd mae’n rhaid i mi dalu fy Ardrethi Busnes?  

A. Mae eich Ardrethi Busnes yn daladwy mewn rhandaliadau misol (oni bai eich bod wedi dewis talu lwmp swm neu bob hanner blwyddyn).  Mae’r rhandaliadau hynny’n ddyledus fel a nodwyd ar eich bil diweddaraf, sy’n golygu y dylai’r taliadau hynny fod wedi cyrraedd eich cyfrif Ardrethi Busnes erbyn y dyddiadau a nodir. 
Os ydych yn talu mewn banc, dylech wneud eich taliad o leiaf 6 diwrnod gwaith cyn y diwrnod dyledus er mwyn sicrhau y bydd yr arian yn eich cyfrif erbyn y dyddiad hwnnw. 
Os ydych yn postio eich taliad, dylech ei bostio cyn y dyddiad dyledus fel y bydd yn cael ei brosesu ac yn eich cyfrif mewn pryd.  Os ydych yn defnyddio post ail ddosbarth, dylech ei bostio o leiaf 3 diwrnod gwaith cyn y dyddiad dyledus. 

C. Pam ydych chi wedi anfon Nodyn Atgoffa/Rhybudd Terfynol/Gwys ata’ i? 

A. Os nad ydych yn talu erbyn y dyddiad dyledus, byddwn yn anfon nodyn atgoffa atoch.  Bydd hyn yn caniatáu i chi ddal i fyny â’r taliadau cyn pen 7 diwrnod ac yna barhau i dalu’r rhandaliadau statudol.  Os bydd eich taliadau yn hwyr eto, byddwn yn anfon ail nodyn atgoffa atoch.  Bydd hyn unwaith eto yn caniatáu i chi ddal i fyny â’r taliadau cyn pen 7 diwrnod a pharhau i dalu drwy gyfrwng rhandaliadau misol.  Ni chyflwynir rhagor o lythyrau atgoffa os nad yw rhandaliadau’r dyfodol yn cael eu talu ar amser gan y byddwch yn colli’r hawl i dalu mewn rhandaliadau. 
Os bydd y taliad yn hwyr eto, byddwn yn anfon rhybudd terfynol atoch.  Ar y cam hwn rydych wedi colli eich hawl i dalu mewn rhandaliadau a bydd yn rhaid i chi dalu’r balans sy’n ddyledus yn llawn cyn pen 7 diwrnod o ddyddiad y rhybudd terfynol.
Os nad ydych yn dangos y swm a ddangosir ar rybudd terfynol cyn pen 7 diwrnod, byddwn yn anfon gwys i chi ymddangos yn y Llys Ynadon.  Os ydych chi’n derbyn Gwys a ddim yn talu’n llawn cyn y gwrandawiad, bydd y Cyngor yn gwneud cais am ‘orchymyn atebolrwydd’.  Mae gorchymyn atebolrwydd yn rhoi’r hawl i’r Cyngor ddefnyddio beiliaid i gael taliad, neu ddechrau achos Methdaliad/Diddymiad mewn rhai achosion, neu ofyn i’r Llys Ynadon ddedfrydu person i garchar. 

 
C. Rydych wedi anfon Gwys ataf ac rydw i eisiau gwneud trefniant i’w dalu.  Pam bod rhaid i mi barhau i dalu’r costau? 

A. Yn ôl y gyfraith, mae costau’n daladwy pan geir gorchymyn atebolrwydd.  Unwaith y cyflwynir Gwys, yr unig ffordd o atal y Cyngor rhag gofyn am orchymyn atebolrwydd yw talu’r swm llawn cyn y gwrandawiad.  Hyd yn oed pan wneir trefniant, mae’n rhaid i’r Cyngor barhau i gael gorchymyn atebolrwydd, ond ni fyddwn yn gweithredu unrhyw un o’r gweithredodd y mae’n caniatáu i ni eu gwneud cyn belled â’ch bod yn cadw at y trefniant y cytunwyd arno.