10.0 CYFLWYNIAD

10.1 Un nod allweddol gan Gyngor Sir Ddinbych yw '...amcanu i greu economi gytbwys ac amrywiol'. Bydd hyn yn ymwneud â hybu'r gwaith o ddatblygu ac arallgyfeirio'r economi leol er mwyn cynyddu'r cyfleoedd cyflogaeth a thrwy hynny, ffyniant y bobl leol. Er mwyn gweithio tuag at gyflawni'r amcan hwn, mae'r CDU yn cynnwys fframwaith cynllunio polisi sydd ar wahân i, ond yn addas i strategaethau a rhaglenni cydlynol y Cyngor, asiantaethau eraill a'r sector cyhoeddus weithredu oddi mewn iddi.

Dylai unrhyw ddatblygiad fod yn gynnaladwy, gan roi ystyriaeth i'r angen am warchod a hyrwyddo adnoddau a'r amgylchedd naturiol. Felly, mae'n rhaid cynnal unrhyw ddatblygiad economaidd yn sensitif mewn ffyrdd sy'n parchu'r amgylchedd lleol a'i ddymunoldeb.

10.2 Defnyddir datblygiadau cyflogaeth yn aml fel term generig sy'n cynnwys amrediad eang o ddefnyddiau tir, gweithgareddau a datblygiadau sy'n creu cyflogaeth. Mae'r bennod hon yn canolbwyntio ar ddatblygiadau diwydiannol, storio a dosbarthu, amaethyddol, swyddfeydd a datblygiadau busnes eraill. Rhoddir ystyriaeth i ffynonellau pwysig eraill o gyflogaeth, megis adwerthu, twristiaeth a mwynau, mewn penodau eraill.

10.3 RÔL CYNLLUNIO

10.4 Dylai awdurdodau cynllunio lleol sicrhau bod

• Digon o dir addas ar gyfer ei ddatblygu at ddefnydd busnes a chyflogaeth, yn cael ei wasanaethu gan isadeiledd da, yn cael ei ddynodi ar gyfer cyflogaeth er mwyn diwallu’r anghenion a arenwyd a’r rhai heb eu harenwi; a bod

• Datblygiadau newydd ar gyfer defnydd busnes a chyflogaeth yn cael eu lleoli a’u gweithredu yn unol ag egwyddorion cynnaladwyedd.

10.5 Mae'r CDU yn gweithio mewn dwy brif ffordd i gynorthwyo gyda chadw, ehangu a chreu datblygiadau cyflogaeth. Yn y lle cyntaf, mae'n neilltuo tir cyflogaeth er mwyn sicrhau darpariaeth bositif ar gyfer amrywiaeth o safleoedd cyflogaeth o ran math, maint a lleoliad. Yn ail, mae'n cynnwys polisïau sydd ar yr un llaw yn darparu hyblygrwydd ond sydd eto, ar y llaw arall, yn darparu rheolau ynghylch yr agweddau negatif ar ddatblygiad cyflogaeth.

10.6 Mae arallgyfeirio ac adfywio economi dwristaidd yr arfordir a’r economi wledig yn faterion y rhoddir sylw iddynt yn y CDU. Dyfarnwyd statws Amcan 1 i Sir Ddinbych fel rhan o Fenter Gorllewin Cymru a’r Cymoedd, gan adlewyrchu ei pherfformiad economaidd gwan.

10.7 STRATEGAETH DDATBLYGU ECONOMAIDD

10.8 Mae Strategaeth Ddatblygu Economaidd y Cyngor ar gyfer 2001/2002 yn nodi dull y Cyngor o ddatblygu'n economaidd.

10.9 Prif elfennau’r strategaeth yw:

• hybu buddsoddiad mewnol

• galluogi i gwmnïau brodorol ehangu

• hwyluso datblygiad hyfforddiant a sgiliau

• llywio adfywiad canol trefi

• datblygu ac arallgyfeirio'r dwristiaeth arfordirol

• mentrau datblygu gwledig

• creu partneriaethau

10.10 Cynhwysir byrdwn eang y polisïau cynllunio defnydd tir a datblygiad yn Rhan 1 o'r CDU sy'n nodi polisi cynllunio strategol Sir Ddinbych. Mewn perthynas â chyflogaeth, nodau strategol y CDU yw:

i) Cynnal a gwella hyfywedd, ffyniant ac amrywiaeth yr economi leol drwy ddarparu gwell cyfleoedd cyflogaeth.

ii) Sicrhau bod digon o dir ac adeiladau, o safbwynt lleoliad, maint a math, ar gael ar gyfer datblygu cyflogaeth a denu buddsoddiad.

iii) Diogelu a darparu ar gyfer anghenion a dyheadau busnesau sy'n bodoli eisoes, ac yn arbennig ar gyfer eu datblygu a'u hehangu.

10.11 Mae polisi cyflogaeth y Rhan 1 Strategol, STRAT 8, yn darparu sylfaen ar gyfer y polisïau a'r bwriadau manwl yn y Bennod hon. Ar ben hynny, mae’n rhaid ystyried datblygiadau cyflogaeth yn erbyn amcanion a pholisïau strategol eraill, yn arbennig mewn perthynas â phriffyrdd a chludiant. Mae datblygu cyflogaeth yn creu mwy o siwrneiau a bydd y Cynllun yn ceisio sicrhau ei fod yn cynnwys mesurau ar gyfer sicrhau patrymau mwy cynnaladwy o deithio.

10.12 GWERTHUSIAD AMGYLCHEDDOL

10.13 Yn gyffredinol, bydd datblygu cyflogaeth yn cael effaith amgylcheddol negatif o safbwynt teithio, adnoddau ac ansawdd yr amgylchedd lleol. Fodd bynnag, bydd meini prawf manwl, ynghyd â pholisïau eraill yn y Cynllun, yn ceisio lleihau neu ddileu'r effeithiau amgylcheddol negatif.

10.14 Mae'r Cynllun yn cyfeirio'r rhan fwyaf o ddatblygiadau cyflogaeth newydd i Brif Ardaloedd Cyflogaeth presennol sydd fel rheol yn agos i ganolfannau poblogaeth gan arwain trwy hynny at lai o ddefnydd o geir a chyfle ar gyfer dulliau eraill o deithio. Gan nad oes cludiant cyhoeddus, bydd Parc Busnes Llanelwy'n parhau i berfformio'n wael yn y cyswllt hwn. Bydd annog ehangu'r diwydiannau presennol ar y safle yn arwain at lai o effeithiau amgylcheddol yn gyffredinol nag adleoli. Gall gweithio o gartref a datblygiadau cyflogaeth gwledig priodol ar raddfa fechan gynorthwyo i weithio tuag at gynnaladwyedd.

10.15 POLISÏAU A BWRIADAU

Polisi EMP 1 - Maint a Dosbarthiad Tir Cyflogaeth

Mae'r Cynllun yn darparu ar gyfer cyfanswm o 164he (405 erw) o dir cyflogaeth yn cynnwys neilltuadau newydd o 84 he (208 erw) a thir cyflogaeth presennol o 80 he (198 erw). Seilir maint, math a lleoliad y tir cyflogaeth ar y ffactorau a ganlyn:

Strategaeth Tir Cyflogaeth a’r Ddarpariaeth

Mae’r Cyngor wedi ymgymryd ag astudiaeth o Strategaeth Tir Cyflogaeth er mwyn canfod lleoliad, math a maint tebygol y tir cyflogaeth y dylid darparu ar ei gyfer. Hefyd, mae’r Cyngor wedi paratoi Papur Pwnc 7 – "Tir Cyflogaeth" sy’n datgan y sail ar gyfer y galw am a chyflenwi tir cyflogaeth yn y CDU. Mae’r ddau yma ar gael ar wahân ac yn egluro graddfa, lleoliad a math y ddarpariaeth o dir cyflogaeth.

Polisi EMP 2 - Prif Ardaloedd Cyflogaeth

Mae'r Prif Ardaloedd Cyflogaeth yn diffinio'r safleoedd ble gwelir y rhan fwyaf o ddatblygiadau cyflogaeth yn ystod cyfnod y Cynllun ac maent yn galluogi cwmnïau sy'n bodoli eisoes i ehangu a/neu ddwysau. Maent wedi'u nodi ar y map bwriadau ac yn cynnwys:-

i) mentrau cyflogaeth presennol

ii) tir gyda chaniatâd cynllunio cysylltiedig â chyflogaeth (ymrwymiadau)

iii) neilltuadau cyflogaeth sydd heb eu datblygu

Diben y polisi hwn yw cadw'r prif ardaloedd cyflogaeth at ddefnydd diwydiannol ac nid at ddefnydd adwerthol/masnachol (A1, A2, A3). Bydd y rhan fwyaf o ddatblygiadau cysylltiedig â chyflogaeth yn dderbyniol oddi mewn i'r Prif Ardaloedd Cyflogaeth yn cynnwys defnyddiau busnes (Dosbarth B1), diwydiant cyffredinol (Dosbarth B2), storio mewn warysau a dosbarthu (Dosbarth B8) yn cynnwys masnachwyr, canolfannau llogi ac allfeydd eraill sy'n gwasanaethu'r byd masnach. Ni fydd allfeydd adwerthol cyffredinol (Dosbarth A1) sy'n gwasanaethu'r cyhoedd yn dderbyniol oni bai eu bod yn ategol i'r prif ddefnydd o'r adeilad ar gyfer gweithgynhyrchu neu ddibenion ymgynnull. Nid yw'r polisi hwn yn berthnasol i Barc Busnes Llanelwy sydd wedi'i ddiogelu fel parc busnes o ansawdd uchel.

Mae'r polisi’n berthnasol i adeiladau newydd, trawsnewidiadau a newid defnydd, ailddatblygiadau ac estyniadau. Bydd disgwyl i bob bwriad datblygu weddu â'u hamgylchfyd o safbwynt lleoliad a safle, llunwedd, ffurf, dyluniad, deunyddiau a thirluniad. Bydd raid rhoi sylw arbennig i effaith y prosesau diwydiannol a phrosesau eraill, a storio y tu allan, ar ddymunoldeb yr ardal i breswylwyr cyfagos a defnyddwyr eraill.

Mae'r tir i'r dwyrain o Pilkingtons oddi mewn i Brif Ardal Gyflogaeth Parc Busnes Llanelwy at ddibenion ehangu yn unig. Cynhwysir tir i'r gorllewin o Stad Ddiwydiannol Gwersyll Cinmel oddi mewn i ffiniau datblygu er mwyn galluogi'r posibilrwydd o ddatblygiad cyflogaeth pe bai unrhyw dir yr MOD yn dod ar gael

Mae’r Prif Ardaloedd Cyflogaeth fel a ganlyn:

Polisi EMP 3 - Parc Busnes Llanelwy

Dyfarnwyd caniatâd cynllunio amlinellol i Barc Busnes Llanelwy fel parc busnes ansawdd uchel, dwysedd isel i roi lle i ddefnyddiau busnes B1. Mae'r Parc wedi cael ei ddatblygu’n rhannol yn awr. Ar safle rhwng Llanelwy a Bodelwyddan, mae'r Parc wedi'i leoli oddi mewn i amgylchfyd gwledig atyniadol o barcdir. Yn unol â hynny, mae'n ofynnol sicrhau bod unrhyw ddatblygiadau yn cael eu dylunio a'u gosod allan gan barchu ansawdd uchel y tirlun o amgylch. Mae canllaw cynllunio/dylunio safle ar gael yn nodi cyfarwyddyd ar gyfer datblygu'r Parc.

Polisi EMP 4 - Datblygiadau Cyflogaeth Oddi Mewn i'r Ffiniau Datblygu

Er bod y rhan fwyaf o ddatblygiadau cyflogaeth i'w gweld yn y Prif Ardaloedd Cyflogaeth, bydd bwriadau ar gyfer datblygiadau cyflogaeth yn dod i'r amlwg mewn mannau eraill mewn trefi a phentrefi o dro i dro. Os nad oes unrhyw neilltuadau tir ar gyfer cyflogaeth wedi'u gwneud mewn pentref neu dref wledig, mae'n bwysig diwallu anghenion busnesau newydd bychain os am ddarparu swyddi.

Bydd ailddefnyddio neu ailgylchu tir ac adeiladau at ddefnydd cyflogaeth yn lleddfu'r pwysau ar yr angen am safleoedd gwyrdd a gall gael gwared o safleoedd blêr ac adeiladau dirywiedig. Bydd annog ardaloedd defnydd cymysg o gymorth i gryfhau cymunedau a lleihau'r angen am siwrneiau mewn ceir preifat. Fodd bynnag, mae'r polisi yn cydnabod pwysigrwydd diogelu dymunoldeb yr ardaloedd preswyl, a defnyddiau tir sensitif eraill. Yn yr un modd, bydd yr effaith ar yr amgylchedd lleol ac ar y rhwydwaith o briffyrdd lleol yn ystyriaethau pwysig. Bwriad y polisi hwn yw darparu cyflogaeth B1 yn bennaf, y gellir ei lleoli'n foddhaol fel rheol oddi mewn i ardaloedd preswyl/masnachol cymysg sy'n bodoli eisoes, neu ardaloedd preswyl yn bennaf. Bydd yr hyn sy’n dderbyniol yn dibynnu ar faint/math y datblygiad a chymeriad yr amgylchedd.

Mewn rhai achosion, bydd yn ofynnol rhoi ystyriaeth i, darparu ar gyfer a rheoli'r gwaith o ehangu a dwysau defnydd, a thrwy hynny atal niwed o ganlyniad. Sicrheir hyn drwy orfodi amodau cynllunio neu gytundebau cysylltiedig â materion megis oriau gweithredu, swn, mathau o beiriannau, storio, nwyon a ryddheir a llygredd etc.

Polisi EMP 5 - Datblygiad Cyflogaeth ar Raddfa Fechan y tu Allan i'r Ffiniau Datblygu

Mae arallgyfeirio'r economi leol yn nod bwysig yn y Cynllun. Ceir llawer o adeiladau amaethyddol ac adeiladau eraill yng nghefn gwlad nad ydynt yn cael eu defnyddio ar gyfer eu diben gwreiddiol bellach ac mewn sawl achos, gellir addasu'r rhain i roi lle i ddefnyddiau cyflogaeth ar raddfa fechan. Bydd hyn yn gweithio tuag at sicrhau economi a chymuned wledig ymarferol a chytbwys tra bydd ailddefnyddio adeiladau yn atal eu dirywiad ac yn sicrhau bod rhan bwysig o'r dreftadaeth adeiledig wledig yn cael ei gwarchod. Ffafrir trawsnewid adeiladau gwledig at ddefnydd cyflogaeth yn hytrach nag at ddefnydd preswyl.

Mae lleoliadau mewn cefn gwlad agored, y tu allan i'r ffiniau datblygu, yn golygu bod raid rheoli datblygiadau o'r fath er mwyn sicrhau eu bod yn cyd-fynd ag ansawdd uchel cefn gwlad a thirlun y Sir heb amharu dim arno. Dylai unrhyw adeiladau fod yn saernïol gadarn ac yn addas ar gyfer y diben a fwriedir, gan gadw a chynnwys unrhyw nodweddion o bwys. Os nad yw'r cyflwr saernïol yn eglur, bydd angen cynnal arolwg a llunio adroddiad saernïol annibynnol. Mewn rhai achosion, efallai y bydd yn ofynnol addasu, newid a rhoi estyniad bychan er mwyn rhoi lle i'r diben a fwriedir.

Rhoddir sylw sylweddol i raddfa a natur weithredol y bwriad o safbwynt mynediad, cyfleusterau parcio a throi, yr effaith ar ddymunoldeb a chymeriad yr ardal o amgylch. Ni ddylai'r bwriad arwain at naill ai orddatblygu'r adeilad neu'r safle, nac arwain at nodwedd ymwthiol ar y tirlun. Mae'r polisi'n dweud ei bod yn ofynnol rhoi ystyriaeth i sgôp unrhyw ehangu neu ddwysau yn y dyfodol, heb effeithio'n annerbyniol ar ddymunoldeb, y tirlun, yr amgylchedd a'r rhwydwaith o briffyrdd yn yr ardal. Mewn sefyllfaoedd lle mae'n rhaid i fusnes ehangu y tu hwnt i'w safle presennol, ceir cyfarwyddyd ynghylch hyn ym mholisi EMP 11.

Dan amgylchiadau arferol, nid yw bwriadau ar gyfer codi adeiladau newydd yng nghefn gwlad yn dderbyniol. Fodd bynnag, mewn sawl pentref gwledig, ni fydd unrhyw gyfleoedd ar gyfer datblygiadau cyflogaeth, boed yn adeiladau newydd neu'n drawsnewidiadau, oddi mewn i ffiniau datblygu. Yn unol â hynny, mae polisi ar eithriadau wedi cael ei lunio sy'n caniatáu datblygiadau cyflogaeth dilys, heb fod o natur hapfuddsoddol ar raddfa fechan y tu allan i, ond yn ymyl y ffiniau datblygu. Bydd yn ofynnol i unrhyw ddatblygiad adeiledig weddu'n ffisegol â'r ardal adeiledig bresennol heb arwain at batrwm gwael neu niweidiol o ddatblygiad. Asesir y bwriadau yn ofalus yn ôl eu graddfa a natur y gweithrediadau yn nhermau'r effaith ar yr amgylchfyd lleol o ran dymunoldeb, y tirlun, yr amgylchedd a thraffig. Ni chaniateir unrhyw geisiadau dilynol am drawsnewid yr adeiladau a ganiateir dan y polisi hwn at ddefnydd preswyl

Polisi EMP 6 - Datblygu Swyddfeydd

Mae llawer o ddatblygiadau swyddfa yn dod oddi mewn i Ddosbarth B1 (Defnydd Busnes). Nid bwriad y rhain yw darparu gwasanaethau yn bennaf ar gyfer aelodau o'r cyhoedd sy'n ymweld, yn hytrach na swyddfeydd gwasanaethau ariannol a phroffesiynol, sy'n dod oddi mewn i ddefnyddiau Dosbarth A2 ac a geir fel rheol yng nghanol trefi. Mae swyddfeydd dosbarth B1 yn tueddu i fod yn droedrydd a gallant weithredu mewn amrywiaeth o leoliadau. Yng nghanol trefi, ni chaniateir swyddfeydd B1 ar loriau isaf y prif strydoedd siopa sydd wedi'u bwriadu at ddibenion adwerthu A1 yn unig, neu ar gyfer A2 (gwasanaethau ariannol a phroffesiynol) neu A3 (bwyd a diod) sy'n darparu gwasanaethau ar gyfer y cyhoedd yn gyffredinol mewn mannau eraill oddi mewn i ganol trefi. Os caiff adeiladau sy'n bodoli eisoes eu trawsnewid at ddefnydd swyddfa B1, boed mewn cefn gwlad cyffredinol neu mewn ardaloedd preswyl, bydd yr effaith ar gymeriad yr amgylchfyd yn cael ei hasesu’n ofalus.

Polisi EMP 7 - Datblygiadau Cyflogaeth a all Greu Llygredd

Wedi diwygio Gorchymyn Cynllunio Gwlad a Thref (Dosbarthiadau Defnydd) 1987 fis Mawrth 1995, mae'r Dosbarthiadau Defnydd Diwydiannol Arbennig (B4-B7) wedi cael eu cynnwys yn y Dosbarth Defnydd Diwydiannol Cyffredinol (B2). Felly, nid oes unrhyw ddosbarth defnydd diwydiannol arbennig ar wahân. Fodd bynnag, pery'r angen am ddarparu cyfarwyddyd polisi ar leoliad datblygiadau a allai greu llygredd sydd, yn ôl eu natur, â phrosesau diwydiannol sy'n debygol o niweidio'r amgylchedd, y dymunoldeb lleol a iechyd a diogelwch.

Er mai un o brif nodau'r Cynllun yw creu swyddi, ni ddylid sicrhau hyn ar draul yr amgylchedd. Yn wyneb natur wledig Sir Ddinbych, dim ond wedi edrych yn fanwl iawn ar y bwriad er mwyn sicrhau bod y lleoliad, y safle, y dyluniad a natur weithredol y defnydd yn sicrhau cyn lleied ag y bo modd o effaith amgylcheddol ar yr ardaloedd o amgylch y caniateir diwydiant a allai greu llygredd. Yn gyffredinol, dyfernir caniatâd cynllunio yn ddarostyngedig i amodau caeth er mwyn sicrhau bod mesurau lliniaru yn cael eu gweithredu a bod y defnydd yn cael ei wneud mewn modd derbyniol. Asiantaeth yr Amgylchedd Cymru sydd â chyfrifoldeb statudol am reoli pelydriadau a allai greu llygredd megis sŵn, hylif, gwastraff solet etc. a ryddheir i'r aer, i'r ddaear ac i ddŵr. Mae'n rhaid i unrhyw broses fusnes/ddiwydiannol gydymffurfio â'r ddeddfwriaeth honno a sicrhau unrhyw drwyddedau a chaniatâd angenrheidiol a diben y polisi cynllunio defnydd tir yw rheoli'r effaith ar gymeriad yr ardal o amgylch

Polisi EMP 8 - Cyflogaeth/Defnyddiau 'Cymydog Drwg'

Mae un rhan angenrheidiol o'r economi leol yn ymwneud â defnyddiau megis cael gwared o, a storio deunydd gwastraff, glo a ierdydd hen heyrn, malwr ceir a thrin nwyddau trwm/mawr, a defnyddiau tebyg eraill. Fodd bynnag, os na chânt eu rheoli'n briodol, gallant gael effaith annerbyniol ar eu hamgylchfyd, o safbwynt s_n, llwch, arogl, ansawdd weledol yr ardal a'r rhwydwaith o briffyrdd lleol.

Yn wyneb natur y defnyddiau hynny, ni fyddant yn dderbyniol yn gyffredinol ar neilltuadau cyflogaeth newydd nac ym Mharc Busnes Llanelwy, oherwydd mai safleoedd diwydiannol presennol neu hyn neu hen chwareli sy'n addas ar eu cyfer, yn ddarostyngedig i fesurau diogelwch. Er mwyn gwarchod defnyddiau blêr rhag lledaenu i ardaloedd mwy sensitif, dylid lleoli 'cymdogion drwg' fel nad ydynt yn cael effaith weledol ymwthiol nac yn amharu ar ddatblygiad neu ddefnydd o dir cyfagos. Rheolir natur weithredol defnyddiau o'r fath drwy osod amodau cynllunio

Polisi EMP 9 - Gweithio o Gartref

Mae llawer o fusnesau bychain a rhai mathau o swyddi naill ai yn dechrau neu yn gweithredu'n barhaol o gartref. O ganlyniad i dechnoleg a dulliau cyfathrebu newydd, mae'n dod yn haws o hyd i bobl weithio o gartref. Mae hyn yn arbennig o bwysig mewn eiddo a phentrefi gwledig ynysig lle mae teithio yn anodd ac yn gostus; mae'n lleihau'r cymudo ac o gymorth i gynnaladwyedd. Fodd bynnag, mae'n bwysig nad yw unrhyw waith a wneir o gartref yn weithgaredd fydd yn cynyddu i fod yn fwy nag a ellir ei ddioddef yn rhesymol oddi mewn i ardal breswyl, neu y gellid ei leoli'n rhesymol yng nghanol trefi i fod o gymorth gyda'u hyfywedd a'u ffyniant.

Yn gyffredinol, nid oes angen caniatâd cynllunio ar gyfer gweithio o gartref, cyn belled â bod y gwaith yn ategol i'r prif ddefnydd fel ty sengl. Fodd bynnag, pan fo defnydd o ran o dŷ neu ei fuarth at ddibenion busnes yn newid, neu'n debygol o newid, ei gymeriad cyffredinol fel ty sengl, yna mae angen caniatâd cynllunio o ganlyniad i gynnydd sylfaenol mewn gweithgarwch, ymwelwyr, sŵn, storio a thraffig.

Ymhlith gwahanol enghreifftiau o weithio o gartref mae cerbydau llogi preifat, gwarchod plant, technoleg uchel, peirianneg cartref graddfa fechan a gweithgareddau cysylltiedig â chrefftau. Bydd angen ystyried pob cais yn unol â'i gryfderau ei hun gan gydnabod natur ac effeithiau gwahanol pob un. Oni bai ei bod yn gwbl eglur sut y bydd busnes o gartref yn gweithredu, efallai ei bod yn briodol dyfarnu caniatâd cynllunio am gyfnod dros dro fel bod modd asesu natur y defnydd. Bydd disgwyl i geisiadau gynnwys cynlluniau llawr a chynlluniau safle, yn manylu ynghylch graddfa'r defnydd busnes, a all gael ei reoli gan amodau cynllunio

Polisi EMP 10 - Gwarchod Tir/Adeiladau Cyflogaeth

Oherwydd ansawdd uchel y tirlun, a'r rhwystrau amgylcheddol ac eraill sy'n bresennol yn y Sir, mae'n anodd arenwi safleoedd cyflogaeth, yn arbennig yn yr ardaloedd gwledig. Felly, mae'n bwysig bod safleoedd ac eiddo a glustnodir ar gyfer datblygiadau cyflogaeth yn cael eu cadw at y defnydd hwnnw er mwyn sicrhau amrywiaeth o gyfleoedd yn nhermau lleoliad, math a maint. Fodd bynnag, fe all fod amgylchiadau eithriadol pryd ailddefnyddir tir neu eiddo cyflogaeth ar gyfer datblygiad neu ddefnydd arall. Bydd hyn yn dibynnu ar natur yr eiddo neu'r safle presennol neu natur y datblygiad arfaethedig, ac unrhyw ffactorau perthnasol eraill fel a nodir uchod.

Polisi EMP 11 - Ehangu/Dwysáu y Safleoedd/Eiddo Cyflogaeth Presennol

Mae'r pryderon diwydiannol a busnes presennol yn chwarae rôl bwysig yn economi Sir Ddinbych. Mae annog y gwaith o ehangu a datblygu busnesau brodorol yn rhan bwysig o Strategaeth Ddatblygu Economaidd y Cyngor. Mae hyn yn arbennig o berthnasol yn Sir Ddinbych wledig o ystyried ei lleoliad perifferal a'i chymeriad gwledig sy'n cyfyngu ar y sgôp i ddenu buddsoddiadau mewnol mawr.

Bydd ehangu neu ddwysau yn sicrhau'r defnydd mwyaf effeithlon o'r isadeiledd presennol ac fel rheol, mae'n well nag adleoli ar safleoedd gwyrdd a thu allan i'r sir hyd yn oed. Oddi mewn i ardaloedd cyflogaeth sefydledig, nid yw'n debygol y ceir unrhyw wrthwynebiad i ehangu mewn egwyddor. Mewn pentrefi neu oddi mewn i ardaloedd preswyl neu gefn gwlad agored, bydd raid edrych yn ofalus ar effaith unrhyw ehangu a pha un ai yw wedi gordyfu ac yn rhy fawr i'w safle neu ei eiddo presennol, ac yn fwy addas mewn ardal gyflogaeth / fasnachol bresennol. Yr amcan yw sicrhau cydbwysedd gofalus rhwng cefnogi busnesau bychain sy'n tyfu a niwed annerbyniol di-droi'n-ôl i'r amgylchedd ac i gefn gwlad agored

Polisi EMP 12 - Datblygiadau Cyflogaeth Mawr

Er eu bod angen darnau helaeth o dir a buddsoddiad sylweddol mewn isadeiledd, gall cwmnïau mawr ddarparu cyfleoedd gwaith sylweddol a chael effeithiau catalytig pwysig ar yr economi leol. Achlysurol fydd y galw am safleoedd o'r fath ac nid yw'r Cynllun yn neilltuo unrhyw safleoedd penodol.

Mae'r polisi’n darparu ar gyfer datblygiadau cyflogaeth mawr o ansawdd uchel dan amgylchiadau eithriadol, os nad oes modd rhoi lle iddynt naill ar safleoedd neilltuedig, safleoedd gyda chaniatâd cynllunio ar gyfer datblygiadau cyflogaeth neu dir a danddefnyddir. Er mwyn bod yn gymwys ar gyfer ystyriaeth, bydd raid bodloni'r Cyngor bod y bwriad yn ddilys, heb fod yn hapfuddsoddol na thameidiog. Mae'n rhaid i fwriadau fod ar ffurf ceisiadau llawn, manwl a asesir yn ofalus mewn perthynas â'u heffeithiau ar y tirlun, ar gadwraeth natur, ar briffyrdd ac ar fuddiannau eraill o bwysigrwydd cydnabyddedig. Mae'n rhaid i unrhyw ganiatâd cynllunio ddechrau ar y safle o fewn dwy flynedd. Byddai angen asesiad effaith amgylcheddol fel rheol. Lle bo hynny'n briodol, gall gwaith oddi ar y safle, yn cynnwys isadeiledd, cyfleusterau cymunedol, hyrwyddo tirlun a chynefinoedd bywyd gwyllt, gael eu diogelu drwy gyfrwng cytundebau cynllunio

Polisi EMP 13 - Datblygiadau Amaethyddol

Er gwaetha'r dirywiad parhaus o safbwynt cyflogaeth a'r newidiadau posibl yn ystod cyfnod y cynllun, bydd amaethyddiaeth yn parhau i fod yn rhan bwysig o'r economi leol ac yn ffynhonnell gyflogaeth sylweddol. Bwriad y polisi hwn yw cefnogi buddsoddiadau mewn busnesau ffermio er mwyn sicrhau eu hyfywedd a'u ffyniant yn y dyfodol, tra'n parhau i warchod yr amgylchedd. Mae amaethyddiaeth, fel pob busnes arall, yn addasu ac yn newid i amgylchiadau, technoleg newydd etc. a allai arwain at ffurfiau newydd o adeiladau.

Mae llawer o ddatblygiadau amaethyddol wedi'u heithrio o'r angen am ganiatâd cynllunio. Dim ond i'r bwriadau hynny sydd angen caniatâd cynllunio y mae'r polisi hwn yn berthnasol, neu'r bwriadau sy'n ddarostyngedig i'r angen am roi rhybudd ymlaen llaw i'r awdurdod cynllunio. Byddai'n ofynnol i'r bwriadau fodloni gofynion cyffredinol polisi GEN 6

Polisi EMP 14 - Chwarel Dyserth

Chwarel galchfaen segur yw Chwarel Dyserth. Mae hyn yn golygu bod iddi ganiatâd cynllunio a gyhoeddwyd ar 19eg Mehefin 1979 tan y flwyddyn 2042 dan Ddeddf yr Amgylchedd 1995 fel chwarel segur. Mae hyn hefyd yn golygu na all y safle ailddechrau cael ei weithio hyd nes bo cyfres lawn o amodau modern ar gyfer gweithio, adfer ac ôl-ofal o'r chwarel wedi'u cymeradwyo gan yr Awdurdod Cynllunio Mwynau (CSDd).

Defnyddiau cyflogaeth yw'r defnyddiau gorau o ystyried y prinder lleol cydnabyddedig o dir cyflogaeth, hanes blaenorol y safle a'i nodweddion. Fodd bynnag, dylid ystyried defnyddiau eraill megis defnyddiau masnachol, twristaidd a hamdden a thai pe bai modd dangos bod y defnydd gorau yn anymarferol, yn anaddas neu y byddai'n cael effaith annerbyniol ar yr ardal.

O gadw mewn cof yr anawsterau a brofwyd yn y gorffennol gyda gweithrediadau chwarelu, mae'n bwysig hefyd fel rhan o unrhyw ddatblygiad yn y chwarel bod y caniatâd cynllunio segur yn cael ei ddileu. Byddai unrhyw ddatblygiad yn y chwarel yn ddarostyngedig i ddeddfwriaethau a rheoliadau eraill hefyd

Polisi MDA 4 - Ardal Datblygiad Cymysg Pwysig - Cyn -Ysbyty Gogledd Cymru, Dinbych

Caewyd yr ysbyty i gyd yn 1995 wedi iddi weithredu am flynyddoedd fel ysbyty meddwl ranbarthol fawr. Mae unrhyw ymdrechion i ganfod defnyddiau economaidd buddiol o'r adeilad ers hynny wedi bod yn aflwyddiannus. Mae'r safle yn 125 erw o dir coediog, tirluniol gydag adeiladau'n gorchuddio 400,000 troedfedd sgwâr. Mae adeilad gwreiddiol yr ysbyty yn adeilad rhestredig Gradd II* ac mae nifer o'r adeiladau o amgylch wedi'u rhestru hefyd, er bod ychwanegiadau diweddarach, mwy modern.

Mae'r Cynllun yn mabwysiadu dull realistig ond hyblyg o ddatblygu'r safle yn y dyfodol. Nodau'r Cyngor ar gyfer y safle yw cael hyd i ddefnydd ymarferol arall neu gymysgedd o ddefnyddiau ar gyfer y safle oherwydd ei werth fel grŵp arwyddocaol o adeiladau rhestredig a byddai'n ofynnol i unrhyw fwriad datblygu gyfrannu tuag at hyfywedd a ffyniant tref Dinbych.

Dylai unrhyw ddatblygiad neu ddefnydd o'r safle fod at ddefnydd cyflogaeth neu economaidd yn bennaf ynghyd ag unrhyw gyfleusterau cysylltiedig a defnyddiau'r sector gwasanaethu yn cynnwys

• B1 (diwydiannol ysgafn, swyddfeydd, ymchwil a datblygiad)

• C1 (gwestai)

• C2 (cartrefi preswyl)

• C3 (anheddau)

• D1 (sefydliadau di-breswyl)

• D2 (ymgynnull a hamdden)

• A3 (bwyd a diod) ond heb ddatblygiad / trawsnewid caniataol i siopau A1 oni bai fod hynny'n ategol i'r prif ddefnydd o'r adeilad, ond dim mwy na gofod llawr o 100 m sg.

Dylai unrhyw ddatblygiad preswyl alluogi defnydd economaidd addas o'r prif adeiladau a dylai fod yn ategol i'r prif ddefnydd. Dylai'r bwriadau datblygu fod o ansawdd uchel gan barchu integriti'r adeiladau rhestredig, a'u hamgylchfyd yn gyffredinol.

Ceir cyfarwyddyd datblygu pellach mewn briff datblygu safle sy'n un o gyfres o Nodiadau Cyfarwyddyd Cynllunio Ategol