Ystyriaethau Cyffredinol Parthed Aneddiadau A Datblygiadau

4.1 Mae sawl mater cynllunio’n berthnasol drwy gydol y cynllun. Mae'r rhain yn cynnwys ystyriaethau cynllunio cyffredinol a dderbynnir yn eang ac a ystyrir fel rheol wrth drafod y rhan fwyaf o fwriadau datblygu. Mae'r polisïau a ganlyn yn darparu rhestr wirio gyfleus o feini prawf/ffactorau, a bydd disgwyl i'r Cyngor roi sylw iddynt wrth ystyried pob bwriad i ddatblygu, gan osgoi ailadrodd meini prawf yng ngweddill y cynllun.

4.3 Mae'r polisïau yn y Bennod hon yn cael effaith bositif yn gyffredinol ar yr amgylchedd. Fodd bynnag, gan fod y polisïau o natur gyffredinol, efallai fod achosion pan fo goblygiadau amgylcheddol polisi yn ansicr. Fe'i heglurir yn fanylach mewn polisïau mewn rhannau eraill o'r Cynllun.

Mae ffiniau datblygu yn arf cynllunio sylfaenol sy'n diffinio'n eglur gyfyngiadau ffisegol yr ardaloedd datblygedig, yn cynnwys aneddiadau a'r prif ardaloedd cyflogaeth, boed naill ai drwy'r datblygiad adeiledig presennol neu unrhyw ddatblygiad arfaethedig yn y dyfodol. Yn cael eu hadnabod hefyd wrth yr enwau 'cyfyngiadau' neu 'amlenni', maent wedi'u darlunio ar y Map Bwriadau a'r Cynlluniau Mewnosod, gan ddilyn y nodweddion naturiol lle bo modd (coed, gwrychoedd, dyfroedd, toriad mewn llethr a thirffurfiau) neu nodweddion artiffisial (datblygiadau presennol, waliau, ffensys, ffyrdd, rheilffyrdd, argloddiau a dyfroedd artiffisial).

Oddi mewn i'r ffiniau datblygu, caniateir datblygiadau newydd, mewn egwyddor, cyn belled â'u bod yn cydymffurfio â pholisïau eraill y Cynllun, ystyriaethau cynllunio sylfaenol a'r meini prawf rheoli datblygiad manwl. Gall hyn gynnwys datblygiadau ar safleoedd sydd wedi'u neilltuo neu eu diogelu, neu safleoedd heb eu dynodi (annisgwyl), neu drwy roi estyniad i, addasu neu drawsnewid adeiladau presennol. Mae'r polisi'n cynorthwyo i weithio tuag at batrwm cynnaladwy o ddatblygiad drwy gyfeirio'r rhan fwyaf o'r datblygiadau i'r aneddiadau presennol a thrwy hynny wneud defnydd effeithiol o'r isadeiledd, y cyfleusterau a'r gwasanaethau presennol a lleihau'r galw am deithio.

Lle bydd datblygiad yn digwydd bydd yn cydymffurfio â Pholisi Cynllunio Cymru (2002), sy'n nodi ym Mharagraff 9.3.1 "Bydd datblygiadau tai newydd yn integreiddio'n dda ac yn cysylltu hefo patrwm setladau. Wrth ehangu trefi a phentrefi dylid osgoi creu datblygiad rhuban, ymdoddi setladau i'w gilydd neu ddilyn patrwm datblygu bratiog.

Ar gyfer yr aneddiadau hynny lle mae modd, o ran eu maint, eu ffurf a'u nodweddion, gellir nodi a llunio ffiniau datblygu ar y mapiau bwriadau. Llunnir y ffiniau gan gadw cymeriad, hunaniaeth a hyfywedd y prif ganolfannau, y prif bentrefi a'r pentrefi presennol ond eto, gan ganiatáu datblygiad os yw hynny'n briodol o ystyried yr anghenion, y cyfyngiadau a'r cyfleoedd ar gyfer aneddiadau arbennig.

CANIATEIR DATBLYGU TIR AC ADEILADAU ANANODIADOL ODDI MEWN I FFINIAU DATBLYGU CYN BELLED Â BOD Y DATBLYGIAD:

i) YN CYD-FYND Â'R DEFNYDD TIR O'I AMGYLCH, AC Â CHYMERIAD YR ARDAL, A HEB BERI GORDDATBLYGIAD;

ii) HEB ARWAIN AT UNRHYW GOLLED ANNERBYNIOL O OFOD AGORED;

iii) YN BODLONI POLISÏAU PERTHNASOL ERAILL Y CYNLLUN.

NI CHANIATEIR EHANGU NA DWYSÁU UNRHYW DDEFNYDDIAU ANNYMUNOL NEU ANFODDHAOL.

Nid yw'r holl dir ar y Map Bwriadau wedi'i glustnodi at ddefnydd arbennig, na'i neilltuo ar gyfer datblygiad neu i fod yn ddarostyngedig i bolisi penodol. Mae'n anymarferol ac yn ddiangen arenwi defnydd arbennig ar gyfer pob darn o dir. Yn unol â hynny, mae darnau helaeth o dir, yn arbennig ardaloedd preswyl sefydledig, yn ymddangos fel 'tir gwyn' sy'n 'ananodiadol' ar y Map Bwriadau a'r Cynlluniau Mewnosod. Er y bydd defnyddiau o'r fath yn aros fel ag y maent yn bennaf, nid yw hyn yn golygu na chaniateir newid a datblygu'r defnydd o'r tir. Yn hytrach, rhoddir ystyriaeth i ddatblygiadau (adeiladu o'r newydd, newid defnydd, estyniadau etc.) yn unigol yn erbyn nodau, polisïau ac ystyriaethau hanfodol eraill y Cynllun. Bydd unrhyw ddefnydd neu ddatblygiad presennol sy'n annymunol neu'n anfoddhaol o safbwynt ei effaith yn cael ei atal rhag dwysáu neu ehangu. Er mai nod y Cynllun yw rhoi lle i gymaint ag y bo modd o ddatblygiad oddi mewn i'r ardaloedd adeiledig presennol, ni ddylai hyn arwain at orddatblygu neu orlenwi prif ganolfannau, prif bentrefi neu bentrefi, na cholli gofod agored sy'n werthfawr i'r gymuned o safbwynt hamdden, gwerth ecolegol a rhyddhad gweledol.

NI CHANIATEIR DATBLYGU Y TU ALLAN I'R FFINIAU DATBLYGU AC EITHRIO:

i) PAN FO ANGEN TAI AR GYFER GWEITHWYR FFERM NEU GOEDWIGAETH SY'N GORFOD BYW YN EU GWEITHLE, NEU YN EI YMYL (POLISI HSG 6);

ii) DATBLYGIAD MEWNLENWI SY'N CYNNWYS UN NEU DDAU UNED TY ODDI MEWN I GRWP AMLWG O DAI MEWN CEFN GWLAD AGORED (POLISI HSG 5);

iii) TRAWSNEWID, ADDASU, AILDDEFNYDDIO A RHOI ESTYNIAD I ADEILADAU GWLEDIG SY'N BODOLI EISOES (POLISI HSG 9);

iv) DARPARU CYNLLUNIAU TAI EITHRIOL Y GELLIR EU FFORDDIO YN YMYL PRIF BENTREFI A PHENTREFI (POLISI HSG 11);

v) TAI I GYMRYD LLE TAI ERAILL MEWN CEFN GWLAD AGORED (HSG 8);

vi) DATBLYGIAD MEWN PERTHYNAS AG AMAETHYDDIAETH, ECHDYNNU MWYNAU, ARALLGYFEIRIO'R ECONOMI WLEDIG, TWRISTIAETH WLEDIG, HAMDDEN A SEFYDLIADAU ADDYSGOL/SEFYDLIADOL PRESENNOL AC ADLONIANT, CYN BELLED NAD YW'N CAEL EFFAITH ANNERBYNIOL AR YR AMGYLCHEDD CYMDEITHASOL, NATURIOL AC ADEILEDIG;

vii) GWAITH HANFODOL YN GYSYLLTIEDIG AG YMGYMERWYR STATUDOL YN DDAROSTYNGEDIG I GYMRYD MESURAU DIOGELWCH AMGYLCHEDDOL PRIODOL.

Y tu hwnt i ffiniau datblygu, neu oddi mewn i 'gefn gwlad agored' a'r arfordir sydd heb ei ddatblygu, er mwyn gwarchod y cefn gwlad agored, ni chaniateir datblygiadau newydd fel rheol. Fodd bynnag, ceir achosion penodol sy'n ymwneud â datblygiadau presennol neu â bwriadau ar gyfer datblygiadau newydd sydd (i) yn cwrdd â nodau'r Cynllun o adfywio ac arallgyfeirio cefn gwlad a (ii) yn hanfodol ac yn angenrheidiol i'w lleoli yng nghefn gwlad, lle caniateir datblygiad newydd.

Oherwydd natur wledig Sir Ddinbych, mae'r datblygiadau'n wasgarog ac wedi'u dosbarthu ar hyd a lled cefn gwlad y sir. Nid oes modd adnabod y 'pentrefannau' hyn neu'r grwpiau o dai ac adeiladau eraill fel "aneddiadau" na'u diffinio felly gan eu bod, yn aml, heb fawr ddim cysylltiad â'i gilydd ac yn wasgarog iawn. Yn yr achosion hyn, ni chaniateir datblygiadau pellach, gan y byddai hynny'n arwain at drefoli ychwanegol ac annymunol mewn ardaloedd gwledig. Hefyd, ceisir osgoi datblygiadau rhuban, yn unol â’r eglurhad o bolisi GEN 1. Gwneir darpariaeth benodol ym mholisi HSG 5 ar gyfer datblygiad mewnlenwi o un neu ddau uned ty oddi mewn i grwpiau amlwg o dai mewn cefn gwlad agored.

MAE BARRAU GWYRDD WEDI'U DYNODI AR Y MAPIAU BWRIADAU ER MWYN:

i) DIOGELU'R CEFN GWLAD O AMGYLCH NEU'R ARFORDIR SYDD HEB EI DDATBLYGU;

ii) ATAL TREFI CYFAGOS RHAG UNO;

iii) GWARCHOD CYMERIAD ARBENNIG Y TREFI HANESYDDOL;

iv) CYNORTHWYO GYDAG ADFYWIAD TREFOL.

ODDI MEWN I'R BARRAU GWYRDD, NI CHANIATEIR DATBLYGIADAU ONI BAI Y GELLIR DANGOS NA NIWEIDIR CYMERIAD AGORED AC YMDDANGOSIAD Y TIR.

BARRAU GWYRDD DYNODEDIG

Prestatyn - Y Rhyl (I'r Gogledd o Ffordd yr Arfordir ac i'r De o lein y rheilffordd)	Prestatyn - Gronant
Prestatyn - Galltmelyd	Rhuthun (De)
Y Rhyl - Rhuddlan	Trefnant - Parc Clwydian
Dinbych (De)	Galltmelyd - Dyserth

Gwahoddwyd holl ACLl'au Cymru i ystyried Beltiau Gwyrdd yng Nghymru. Rhagflaenwyd hyn gan Gynllun Strwythur Drafft Clwyd (Ail Addasiad) oedd yn codi cwestiynau ynghylch Beltiau Gwyrdd yng Nghlwyd. Wedi ymgynghori â'r cyhoedd, cadwodd y Cynllun y barrau gwyrdd, yn ddarostyngedig i adolygiad strategol a chynigiodd Felt Werdd yn ymyl y ffin â Swydd Caer. Fodd bynnag, wedi ymgynghoriad cyhoeddus pellach, argymhellwyd dileu'r Felt Werdd arfaethedig.

Mae barrau gwyrdd wedi bod yn cael eu gweithredu yn hen sir Clwyd ers i'r Cynllun Strwythur cyntaf gael ei gymeradwyo yn 1982. Mae eu rôl yn debyg iawn i rôl y Beltiau Gwyrdd drwy warchod cefn gwlad agored ac atal aneddiadau rhag uno. Maent yn wahanol, fodd bynnag, oherwydd eu statws, eu maint a'u parhauster.

Mae Beltiau Gwyrdd yn arf polisi cenedlaethol a statudol ac maent yn llawer mwy parhaol gan bara am o leiaf 30 mlynedd cyn cael eu hadolygu. Arf polisi lleol, anstatudol yw barrau gwyrdd, ac fel rheol, maent yn para am gyfnod y Cynllun cyn cael eu hadolygu. Mae Beltiau Gwyrdd yn berthnasol fel rheol i leiniau mawr o dir sy'n sawl milltir o hyd, o amgylch dinasoedd neu gytrefi mawr lle profir pwysau datblygu sylweddol a chyson. Mae barrau gwyrdd yn llawer llai o ran maint a graddfa, yn ymwneud â 'phocedi' llai o dir, o amgylch neu rhwng aneddiadau.

Gwledig o ran natur yw Sir Ddinbych yn gyffredinol, gyda nifer fawr a phatrwm gwasgarog o drefi a phentrefi bychain, yn profi pwysau datblygu gweddol gymedrol o'u cymharu â chytrefi mwyaf Lloegr. Dyna pam y credir bod Beltiau Gwyrdd yn amhriodol yn Sir Ddinbych.

Yn gyffredinol, mae barrau gwyrdd wedi gweithio'n dda a heb newid fawr ddim. Fodd bynnag, credid bod gormod o farrau gwyrdd, o ran niferoedd a graddfa, yn gwarchod safleoedd a allai gael eu datblygu heb gael llawer o effaith ar yr amgylchedd. Mae'r Barrau Gwyrdd yn hen Gynlluniau Lleol Rhuddlan, Glyndŵr a Cholwyn wedi cael eu hadolygu'n strategol yn erbyn y pedwar maen prawf yn y polisi uchod. Mae llai o Farrau Gwyrdd yn awr, ac ar raddfa lai, ond maent yn fwy strategol gyda'r bwriad o fod yn ddynodiadau polisi hirdymor yn para y tu hwn i gyfnod y cynllun. Nid ydynt wedi cael eu dynodi mewn mannau lle byddent yn atal yn afresymol unrhyw anheddiad rhag ehangu. Yn hytrach, maent yn canolbwyntio ar leiniau neu goridorau cul o dir sy'n profi pwysau datblygu, ble mae'n bwysig cadw cymeriad agored a rhinweddau arbennig eraill y tir. Cryfhau'r barrau gwyrdd sydd wedi'u dynodi yn y Cynllun yw'r nod yn y diwedd.

Mae Barrau Gwyrdd yn chwarae rôl sylfaenol yn Strategaeth Ddatblygu Gyffredinol y Cynllun ble cydbwysir yr angen am ddatblygu yn erbyn yr angen am warchod cefn gwlad. Mae'r tir oddi mewn i'r Barrau Gwyrdd yn agored o ran cymeriad ac ymddangosiad, a dyma'r union nodweddion y mae'r polisi am eu gwarchod.

Ni fydd barrau gwyrdd yn atal pob datblygiad, ac efallai y caniateir defnyddiau tir neu ddatblygiadau sy'n cynnal cymeriad agored y tir, e.e. cyrsiau golff. Nid yw'n dilyn bod barrau gwyrdd o werth tirluniol nac o unrhyw werth arall, yr hyn sy'n hanfodol yw bod cymeriad ac ymddangosiad y tir yn agored. Fodd bynnag, gellir cryfhau'r polisi drwy gytundebau i reoli a gwella'r amgylchedd.

CANIATEIR DATBLYGIADAU SYDD YN UNOL Â PHOLISÏAU A BWRIADAU ERAILL Y CYNLLUN AR YR AMOD:

i) EU BOD YN PARCHU'R SAFLE A'R AMGYLCHEDD O SAFBWYNT LLEOLIAD, LLUNWEDD, GRADDFA, FFURF, DYLUNIAD, DWYSEDD, DEUNYDDIAU, WYNEBWEDD, MICRO-HINSAWDD A DWYSEDD Y DEFNYDD O DIR/ADEILADAU A'R GOFOD O'U HAMGYLCH A RHWNG YR ADEILADAU;

ii) NAD YDYNT YN EFFEITHIO'N ANNERBYNIOL AR FFURF A CHYMERIAD Y TIRLUN A'R TREFLUN O AMGYLCH NA'R AMGYLCHEDD NATURIOL A HANESYDDOL LLEOL;

iii) NAD YDYNT YN EFFEITHIO'N ANNERBYNIOL AR YR OLYGFA I'R CYHOEDD I MEWN I, ALLAN O, NEU AR DRAWS UNRHYW BRIF GANOLFAN, PRIF BENTREF, PENTREF NEU ARDAL O GEFN GWLAD AGORED;

iv) EU BOD YN CYNNWYS, LLE BO MODD, Y TIRLUN NEU'R NODWEDDION ERAILL SY'N BODOLI EISOES, GAN ROI YSTYRIAETH I SIÂP Y TIR A'R NEWIDIADAU MEWN LEFEL GAN OSGOI NENLINELLAU AMLWG;

v) NAD YDYNT YN EFFEITHIO'N ANNERBYNIOL AR DDYMUNOLDEB YR ARDAL I'R PRESWYLWYR LLEOL NEU I DDEFNYDDWYR ERAILL Y TIR A'R EIDDO, NEU AR NODWEDDION YR ARDAL O GANLYNIAD I FWY O WEITHGARWCH, AFLONYDDWCH, SŴN, LLWCH, NWYON, SBWRIEL ETC., AC AR YR AMOD EU BOD YN DARPARU SAFONAU DYMUNOLDEB BODDHAOL;

vi) EU BOD YN DARPARU MYNEDIAD DIOGEL A CHYFLEUS I BOBL GYDAG ANABLEDDAU, CERDDWYR, BEICWYR, CERBYDAU A CHERBYDAU BRYS, LLE BO HYNNY'N BRIODOL, YNGHYD Â MAES PARCIO DIGONOL, GYDA GOFOD I WASANAETHU A THROI CERBYD YN UNOL Â SAFONAU CYMERADWY'R CYNGOR;

vii) NAD YDYNT YN CAEL EFFAITH ANNERBYNIOL AR Y RHWYDWAITH LLEOL O BRIFFYRDD O GANLYNIAD I DAGFEYDD, PERYGL A NIWSANS A GEIR YN SGIL CREU TRAFFIG A GREIR A’U BOD YN CYNNWYS MESURAU RHEOLI/TAWELU TRAFFIG LLE MAE HYNNY’N ANGENRHEIDIOL AC YN BRIODOL;

viii) EU BOD YN RHOI YSTYRIAETH I DDIGONOLRWYDD Y CYFLEUSTERAU A'R GWASANAETHAU CYHOEDDUS PRESENNOL. OS OES ANGEN ISADEILEDD NEWYDD, DYLID BOD MODD EI DDARPARU AM BRIS RHESYMOL AC MEWN AMSER RHESYMOL;

ix) NAD YDYNT YN GWNEUD DRWG I DIR NAC ADEILADAU SYDD WEDI'U DIOGELU AT DDEFNYDD ARALL, NAC YN AMHARU AR DDATBLYGIAD A DEFNYDD O DIR CYFAGOS;

x) EU BOD YN BODLONI'R YSTYRIAETHAU AMGYLCHEDDOL FFISEGOL NEU NATURIOL SY'N YMWNEUD Â SEFYDLOGRWYDD TIR, Y GWAITH O'I DDRAENIO A'R TEBYGOLRWYDD IDDO GAEL EI ORLIFO;

xi) EU BOD YN RHOI YSTYRIAETH I DDIOGELWCH PERSONOL A CHYMUNEDOL O RAN DYLUNIAD A PHATRWM, AC I OFOD CYHOEDDUS/PREIFAT AC YN YSTYRIED GOBLYGIADAU TROSEDDAU AC ANHREFN;

xii) EU BOD YN CYNNWYS MESURAU TIRLUNIO ADDAS YN CYNNWYS, LLE BO HYNNY’N BRIODOL, TRINIAETH DIRLUNIO FEDDAL A CHALED A THREFNIADAU AR GYFER GWAITH CYNNAL A CHADW DILYNOL;

xiii) EU BOD YN RHOI YSTYRIAETH I GREU, TRIN A CHAEL GWARED O WASTRAFF.

Mae'r polisi hwn yn amcanu at sicrhau bod bwriadau datblygu'n cydymffurfio â'r meini prawf rheoli datblygiad a dderbynnir yn eang a sicrhau yr ymgymerir â hwy mewn dull priodol, i safon uchel a chyda chyn lleied ag y bo modd o effaith. Mae'n darparu man cyfeirio defnyddiol ar gyfer y rhai sy'n cyflwyno ceisiadau cynllunio neu sy'n rhoi bwriadau datblygu ger bron. Cynhwysir y meini prawf mewn polisïau dilynol pan fônt yn benodol berthnasol i'r mater datblygu dan sylw a phan fo angen darparu cyfarwyddyd polisi manylach

Dylid cydnabod nad yw pob maen prawf yn berthnasol i bob ffurf o ddatblygiad. Yn fwy na hynny, nid yw'r rhestr o feini prawf yn cynnwys popeth a dylid edrych bob amser ar bolisïau a bwriadau eraill y Cynllun fel sy'n berthnasol i'r bwriadau datblygu dan sylw.

Wrth ystyried bwriadau datblygu, rhoddir ystyriaeth i unrhyw oblygiadau o ran troseddu ac anhrefn fel sy’n ofynnol dan y Ddeddf Troseddu ac Anhrefn a’r Ddeddf Gwahaniaethu ar Sail Anabledd hefyd.

Mae’r iaith Gymraeg yn elfen bwysig o ffabrig cymdeithasol y Sir. Siaredir y Gymraeg gan ryw 26% o boblogaeth y Sir. Mewn sawl cymuned wledig yn y de a’r gorllewin, mae’r iaith Gymraeg yn rhan bwysig iawn o ffabrig cymdeithasol yr ardal. Mewn 14 allan o 39 o ardaloedd cymunedol mae cyfran y bobl sy’n siarad y Gymraeg yn fwy na 50%. Ceir y dwyseddau uchaf o siaradwyr y Gymraeg yng Ngwyddelwern, Cynwyd, Llandrillo, Cyffylliog, Betws Gwerful Goch a Llanrhaeadr yng Nghinmeirch. Yn y cymunedau hyn mae canran y rhai sy’n siarad y Gymraeg yn fwy na 60%.

Cred y Cyngor y dylai polisïau a bwriadau’r Cynllun Datblygu Unedol roi ystyriaeth i’r iaith Gymraeg ac y dylai fod yn ystyriaeth sylfaenol wrth benderfynu ynghylch ceisiadau ac apeliadau cynllunio.

Mae graddfa a math y tai a’r ddarpariaeth o gyflogaeth yn dylanwadu ar ffyniant yr iaith Gymraeg hefyd. Ond dim ond un ffactor yw hyn. Ceir llawer o ddylanwadau eraill y tu allan i reolaeth y system gynllunio sy’n dylanwadu ar yr iaith Gymraeg a’i diwylliant. Gwyddir bod y cynnydd mewn tai, yn cynnwys stadau mawr mewn pentrefi gwledig, wedi cael effaith niweidiol ar yr iaith Gymraeg. Mae Strategaeth a pholisïau’r CDU yn ceisio darparu twf cytbwys er mwyn diwallu anghenion lleol am dai a swyddi gyda’r rhan fwyaf o’r datblygiadau yn y prif ganolfannau. Mae’r Cynllun hefyd yn ceisio lleihau’r lefelau blaenorol o gynnydd yn y byd tai. Ni fwriedir gweld unrhyw ddatblygiadau ar raddfa fawr mewn aneddiadau llai. Bydd y polisïau cyflogaeth yn darparu cyfleoedd gwaith mewn ardaloedd gwledig ac yn darparu cymunedau cynnaladwy.

Mae Polisi GEN 7 yn ymwneud â bwriadau datblygu ar raddfa ac o gymeriad sy’n debygol o gael effaith annerbyniol ar y gymuned ehangach, yn cynnwys y bwriad i godi arwyddion. Gwrthodir datblygiadau sy’n peri anghydbwysedd neu sy’n cael effaith niweidiol ar gydbwysedd ieithyddol a chymdeithasol anheddiad.

Bydd y Cynllun yn mabwysiadu dull rhagofalol o weithredu fydd yn galw ar i’r datblygwr, lle mae niwed sylweddol yn debygol, gynnwys gwybodaeth ac eglurhad priodol parthed effeithiau tebygol y bwriad ar yr iaith Gymraeg a chymeriad diwylliannol yr ardal.

Bydd y Cyngor yn paratoi Gyfarwyddiadau Cynllunio Ategol yn darparu cyfarwyddyd manwl ac yn amlinellu, yn arbennig, y dull o weithredu a argymhellir parthed mesur 'niwed sylweddol'.

Nid yw’r ffaith bod yr ymgeisydd yn siarad y Gymraeg neu beidio yn ystyriaeth gynllunio sylfaenol ac nid yw’n golygu bod modd ffafrio bwriad ar draul polisïau cynllunio perthnasol.

Bydd effaith y Cynllun a’r penderfyniadau datblygu ar yr iaith Gymraeg a’i diwylliant yn cael ei fonitro yn ofalus. Cynhwysir y manylion hyn mewn adroddiad monitro ar wahân.

Mae ymrwymiadau cynllunio cyfreithiol rhwng awdurdod cynllunio lleol a datblygwyr yn dod yn fwy a mwy cyffredin er mwyn sicrhau bod bwriadau datblygu yn dderbyniol o safbwynt cynllunio defnydd tir. Gall ymrwymiadau cynllunio:

Efallai mai dim ond pan fo hynny'n angenrheidiol i bolisi/bwriad y cynllun datblygu y defnyddir ymrwymiadau cynllunio, neu wrth ddyfarnu caniatâd cynllunio sy'n berthnasol i gynllunio ac i'r datblygiad a ganiatawyd. Dim ond os nad oes modd goresgyn problemau drwy ddefnyddio amodau cynllunio fydd y Cyngor yn defnyddio mesurau o'r fath. Ni fyddant yn cael eu defnyddio i gefnogi nac i gymeradwyo bwriadau sy'n annerbyniol fel arall ar sail y ffaith bod rhyw fath o 'fudd' wedi'i gynnig i'r gymuned. Mae ymrwymiadau cynllunio o'r fath yn rhan allweddol o'r Strategaeth Ddatblygu Gyffredinol a, lle bo hynny'n angenrheidiol ac yn briodol, byddant yn ymwneud ag amrywiaeth o ffactorau y bydd 'budd cymunedol' yn deillio ohonynt yn cynnwys isadeiledd, cyfleusterau a gwasanaethau, parcio, gofod agored, tirlunio a chadwraeth natur.

Isod, nodir y polisïau a'r bwriadau lle bydd yn ofynnol sicrhau budd cymunedol efallai;

Bydd angen Asesiad Amgylcheddol ar gyfer rhai mathau penodol o brosiectau sy'n debygol o gael effaith sylweddol ar yr amgylchedd yn rhinwedd eu natur, eu maint a'u lleoliad, yn unol â‘r Rheoliadau Cynllunio Gwlad a Thref (Asesiad Amgylcheddol) 1999 a Chylchlythyr Asesiad Effaith Amgylcheddol 11/99.

Mae Asesiad Amgylcheddol (A.A.) yn broses o gasglu, asesu a rhoi ystyriaeth i wybodaeth am effeithiau amgylcheddol tebygol rhai mathau o ddatblygiad, a hynny gan y datblygwr (fel rhan o ddyluniad y prosiect) a chan yr awdurdod cynllunio lleol (er mwyn penderfynu ar ba mor dderbyniol yw'r cais cynllunio). Os oes angen Asesiad Amgylcheddol, mae'n rhaid i'r datblygwr baratoi a chyflwyno Datganiad Amgylcheddol i gyd-fynd â'r cais cynllunio.

Mae'r Rheoliadau'n rhannu prosiectau yn ddatblygiadau Atodlen 1 ac Atodlen 2. Mae'n ofynnol i brosiectau Atodlen 1 fod ag A.A. ym mhob achos ac mae'n cynnwys enghreifftiau megis purfeydd olew, gorsafoedd pŵer etc. Efallai y bydd yn ofynnol i brosiectau Atodlen 2 gyflwyno A.A. yn ôl mympwy'r Cyngor, cyn belled â bod y datblygiad yn debygol o greu effeithiau amgylcheddol sylweddol. Gall yr enghreifftiau gynnwys adeiladau magu moch neu ieir, gweithfeydd cloddiol a rhai diwydiannau gweithgynhyrchu. Os nad yw'r datblygiad yn dod oddi mewn i Atodlen 1 neu 2, ond yn cael effaith sylweddol ar yr amgylchedd, bydd y Cyngor angen gwybodaeth amgylcheddol gefnogol addas. Bydd hyn yn cynnwys gwybodaeth ddigonol i asesu effeithiau amgylcheddol datblygiad arfaethedig yn briodol.

Mae cyfres o Nodiadau Canllawiau Cynllunio Atodol (CCA) wedi cael eu paratoi a'u cymeradwyo gan y Cyngor a byddant yn ddarostyngedig i ymgynghoriad cyhoeddus. Bydd y nodiadau hyn yn cyd-fynd â, ac yn ymhelaethu ar lawer o'r polisïau a'r bwriadau yn y Cynllun. Byddant yn darparu cyngor manylach ac yn nodi'r canllawiau i'w hystyried wrth benderfynu ynghylch ceisiadau cynllunio. Yr amcan ym mhob achos fydd gwella ansawdd y datblygiad. Bydd nodiadau cyfarwyddyd unigol yn cael eu diweddaru ac fe gyhoeddir rhai newydd fel a phan fo angen.

ODDI MEWN I FFINIAU DATBLYGU, CANIATEIR CEISIADAU AM GANIATÂD I ARDDANGOS HYSBYSEBION ALLANOL AR YR AMOD EU BOD:

i) O FAINT A MATH SY'N GWEDDU'N DDA I'R ADEILAD Y'U GOSODIR ARNO;

ii) O SAFON UCHEL O SAFBWYNT DYLUNIAD A DEUNYDDIAU;

iii) WEDI'U LLEOLI FEL NAD YDYNT YN PERYGLU DIOGELWCH AR Y FFORDD;

iv) YN GWEDDU Â NAWS Y STRYD O AMGYLCH HEB AMHARU DIM ARNO;

v) EU BOD YN SICRHAU CYN LLEIED AG Y BO MODD O DDWYSEDD O RAN GOLEUO.

Yr Awdurdod Cynllunio Lleol sy'n penderfynu ar geisiadau am hysbysebion awyr agored er lles dymunoldeb a diogelwch y cyhoedd. Gall hysbysebion sydd wedi'u dylunio a'u lleoli'n briodol gyfrannu'n bositif tuag at gymeriad adeilad neu ardal. Fodd bynnag, gall hysbysebion mewn lleoliad gwael, sy'n llachar ac yn rhy fawr, amharu ar neu beryglu diogelwch, drwy ddrysu gyrwyr mewn arwyddion traffig neu groesfannau i gerddwyr er enghraifft. Hefyd, gall toreth o hysbysebion, a chynnydd yn eu maint a'u hamlygrwydd yn unigol a chyda'i gilydd, amharu ar ddymunoldeb yr ardal. Felly, dylid osgoi unrhyw orlenwi a dryswch diangen mewn stryd a all fod yn lle prysur eisoes, a sicrhau nad yw arwyddion yn cuddio nac yn amharu ar nodweddion eraill yr amgylchedd.

Y TU ALLAN I FFINIAU DATBLYGU, DIM OND OS YDYNT WEDI'U LLEOLI AR NEU YN UNIONGYRCHOL GYFAGOS I'R EIDDO Y MAE'R HYSBYSEB YN YMWNEUD AG EF Y CANIATEIR ARDDANGOS HYSBYSEBION, NEU OS YDYNT YN DARPARU CYFEIRIAD NEU RYBUDD YMLAEN LLAW HANFODOL YNGHYLCH EIDDO ER LLES DIOGELWCH Y CYHOEDD, AR YR AMOD:

i) EU BOD YN BRIODOL AC YN CYD-FYND Â'R ARDAL O AMGYLCH;

ii) NAD YDYNT YN AMHARU AR DDYMUNOLDEB GWELEDOL YR ARDAL;

iii) NAD YDYNT YN CAEL EFFAITH ANNERBYNIOL AR Y TIRLUN NAC AR FUDDIANNAU CADWRAETH NATUR;

iv) EU BOD WEDI'U GWNEUD O DDEUNYDDIAU TRADDODIADOL A'U BOD O FAINT A LLIW PRIODOL;

v) BOD DWYSEDD UNRHYW OLAU YN CAEL EI GADW I'R LLEIAFSWM MEWN MANNAU LLE MAE GOLAU YN DDERBYNIOL Y TU ALLAN I ARDALOEDD GYDA STRYDOEDD WEDI'U GOLEUO;

vi) NAD YDYNT YN PERI NAC YN CREU PERYGL I DDIOGELWCH Y BRIFFORDD.

Mae pob hysbyseb yn yr awyr agored yn effeithio ar ymddangosiad y tirlun a'r cefn gwlad. Gall arwyddion siopau, garejis, gwersylloedd gwyliau, tafarndai, busnesau gwledig a digwyddiadau fod yn nodweddion aflonyddol, yn enwedig mewn cefn gwlad agored ac mewn AHNE. Gall golau cryf darfu ar fuddiannau cadwraeth natur hefyd a pheri llygredd trwy olau yn yr awyr yn y nos. Mewn ardaloedd gwledig, mae'r Cyngor yn derbyn bod angen arwyddion cyfeiriadol ymlaen llaw os yw busnesau wedi'u lleoli beth pellter oddi wrth y priffyrdd. Fodd bynnag, dylid cadw arwyddion o'r fath i leiafswm a sicrhau bod eu hymddangosiad yn briodol i'r ardal. Mae deunyddiau traddodiadol fel rheol yn golygu pren wedi'i staenio neu eu baentio gyda llythrennau wedi'u paentio arno.

Gall darparu gweithiau celf mewn mannau cyhoeddus fod yn ffactor allweddol o safbwynt hyrwyddo ansawdd datblygiad a'r amgylchedd lleol. Bydd celf gyhoeddus yn arbennig o bwysig mewn trefi a chanolfannau dosbarth, ardaloedd cadwraeth a datblygiadau cyflogaeth/masnachol mawr ymhlith eraill. Yn ychwanegol at y "gweithiau celf" arferol, dylid rhoi ystyriaeth hefyd i gynnwys celf mewn nodweddion megis waliau, rheiliau, giatiau a mesurau tirlunio. Efallai fod Swyddog Celf y Sir ar gael i drafod bwriadau.