Mae gwarchodfa natur yn y Rhyl yn barod i agor brigau’r coed i ddenu bywyd gwyllt adeiniog i gartrefi newydd.
Mae Gwasanaeth Cefn Gwlad Cyngor Sir Ddinbych a gwirfoddolwyr wedi bod yn gosod blychau adar ac ystlumod newydd yn y berllan gymunedol ar ochr ddeheuol Gwarchodfa Natur Pwll Brickfield.
Mae’r gwaith ailddatblygu wedi helpu i gysylltu hen berllan gymunedol a phwll â’r prif safle. Mae’r gwaith ailddatblygu wedi cynnwys creu llwybr newydd, clirio prysgwydd, gosod ffensys newydd a chodi pont bren i gysylltu’r ddwy ardal.
Mae’r bont yn cysylltu â llwybr cylchol o amgylch y pwll ac mae’r cyrsiau dŵr wedi’u clirio i annog llygod pengrwn y dŵr i’r safle, gan helpu i wella bioamrywiaeth.
Gyda chefnogaeth Natur Er Budd Iechyd, mae’r grwp wedi agor drysau tri blwch adar yn ddiweddar, yn ogystal â bocs ystlumod yn y berllan.
Mae blychau ystlumod yn bethau defnyddiol i ddarparu safle nythu diogel i ystlumod, gan gefnogi poblogaethau lleol a, gyda nifer yr adar coetir yn dirywio, mae’r blychau bach ychwanegol yn mynd i ddarparu amgylchedd mwy diogel i rywogaethau lleol.
Mae’r blychau ar uchder yn ychwanegol at y blychau ar lefel y tir sydd wedi’u gosod i gefnogi draenogod a phryfed y warchodfa.
Meddai’r Ceidwad Cefn Gwlad, Vitor Evora: “Rydym ni’n ddiolchgar iawn i’r gwirfoddolwyr sydd wedi ein helpu ni i osod y cartrefi pwysig yma ar gyfer ystlumod ac adar gan fod arnom ni angen cefnogi’r anifeiliaid hyn i atal dirywiad yn eu niferoedd – ac mae bioamrywiaeth y berllan yn ein caniatáu ni i wneud hynny.
“Rydym ni hefyd wedi gosod camera ar yr ochr ac rydym ni eisoes wedi gweld sawl rhywogaeth o adar yma, ac felly bydd y cartrefi yma yn eu cefnogi nhw.”
Meddai’r Cynghorydd Barry Mellor, Aelod Arweiniol yr Amgylchedd a Chludiant, a Chefnogwr Bioamrywiaeth y Cyngor: “Mae’n braf gweld prosiect Pwll Brickfield yn parhau i dyfu ac estyn help llaw i fywyd gwyllt. Pob clod i’r gwirfoddolwyr a’r staff cefn gwlad am barhau i wneud y safle hwn yn ased fioamrywiaeth bwysig i’r warchodfa natur.”