Bydd pŵer trydan yn ymestyn cynllun cludiant cyhoeddus sy’n ymateb i alw gan y cyhoedd yn Ninbych.
Mae Cyngor Sir Ddinbych a Thrafnidiaeth Cymru wedi cydweithio i ymestyn y cynllun Fflecsi presennol o amgylch Dinbych.
Bydd Fflecsi 77 ar gael o 17 Gorffennaf ymlaen i dde-orllewin Dinbych, yn ogystal ag i ogledd-orllewin a gogledd-ddwyrain y dref. Nid yw’r ardal bresennol sy’n cynnwys canol tref Dinbych, yn ogystal â pharthau presennol yn Rhuthun a Phrestatyn, wedi newid.
Yn rhan o ddatganiad Argyfwng Hinsawdd y Cyngor, fe lansiwyd cynllun Rhuthun yn llynedd gyda bws mini 16 sedd cyntaf erioed yn y wlad â sero allyriadau wedi’i bweru gan fatri, diolch i gefnogaeth gan Lywodraeth Cymru a Gwasanaeth Ynni Llywodraeth Cymru.
Bydd ail gerbyd trydan bellach yn pweru’r llwybr 77 newydd yn Ninbych.
Mae’r Cyngor wedi cyflwyno bws-micro Nissan Dynamo E-NV200 EV sy’n hygyrch i gadeiriau olwyn a fydd yn cael ei ddefnyddio yn rhan o’r cynllun.
Dywedodd y Cynghorydd Barry Mellor, Aelod Arweiniol yr Amgylchedd a Chludiant: “Mae’r Cyngor yn gweithio’n galed i leihau ei ddibynadwyedd ar gerbydau sy’n cael eu pweru gan danwydd ffosil lle y bo’n briodol. Rydym ni’n falch iawn ein bod yn gallu cyflwyno ail gerbyd trydan ar gyfer y gwasanaeth Fflecsi mewn partneriaeth gyda Thrafnidiaeth Cymru yn y sir yn dilyn llwyddiant cerbyd Rhuthun.
“Mae Fflecsi yn cynnig ateb sy’n gallu ymateb i anghenion teithwyr yn llawer mwy penodol. Mae ymestyn y gwasanaeth yn Ninbych wedi galluogi i ni gasglu teithwyr mewn mwy o leoliadau.”
Nodiadau i olygyddion
Bydd teithwyr yn gallu archebu eu cludiant seiliedig ar alw awr o flaen llaw trwy un ai lawrlwytho a defnyddio ap Fflecsi, ar wefan fflecsi.cymru neu trwy ffonio canolfan alwadau ddynodedig. Yna gall yr ap hysbysu’r cwsmer ynghylch unrhyw newidiadau yn yr amseroedd casglu.