Mae Cyngor Sir Ddinbych yn cysylltu â gwirfoddolwyr sydd wedi cynnig cartrefu teuluoedd o ffoaduriaid o'r Wcráin.
Fel rhan o'i ymrwymiad parhaus i gefnogi Cynllun Adsefydlu'r Deyrnas Unedig, mae'r Cyngor yn cysylltu â'r holl drigolion sydd wedi cynnig cymorth i'r rhai sydd wedi'u dadleoli gan y gwrthdaro.
Mae'r Cyngor wedi bod yn gweithio'n agos gyda Llywodraeth Cymru ac yn gwneud y trefniadau angenrheidiol i ddechrau ailsefydlu teuluoedd o'r Wcráin cyn gynted â phosibl.
Mae gan Sir Ddinbych hanes hir o gartrefu a chefnogi ffoaduriaid a thros y pum mlynedd diwethaf, mae'r Cyngor wedi ailsefydlu 25 o deuluoedd, yn cynnwys 95 o unigolion, yn bennaf mewn ymateb i'r argyfwng ffoaduriaid yn Syria ac Afghanistan.
Dywedodd Ann Lloyd, Pennaeth (dros dro) Gwasanaethau Cefnogi Cymunedau: “Mae nifer o drigolion Sir Ddinbych wedi dod ymlaen i gynnig llety i’r rhai sydd wedi cael eu gorfodi i adael y Wcráin oherwydd y gwrthdaro parhaus.
“Ar ran y Cyngor hoffwn ddiolch iddynt am eu haelioni.
“Rydym yn y broses o gysylltu â phreswylwyr sydd wedi cynnig llety i drefnu’r gwiriadau perthnasol cyn y gallwn symud i’r cam nesaf.
“Fel Cyngor rydym hefyd yn gweithio i sicrhau bod y gefnogaeth berthnasol ar gael i deuluoedd ar ôl iddynt gyrraedd Sir Ddinbych.
“Trwy gyllid y Swyddfa Gartref, rydym mewn sefyllfa dda i ddarparu’r cymorth angenrheidiol a chael gweithgor i reoli’r rhaglen, yn ogystal â thîm ymroddedig sy’n gweithio’n uniongyrchol gyda theuluoedd, a chymorth ychwanegol gan bartneriaid yn y trydydd sector a chan grwpiau gwirfoddol lleol .”
Os oes gan unrhyw un unrhyw ymholiadau, neu os hoffent gynnig llety, dylent anfon e-bost at ukresettlement@denbighshire.gov.uk ac am ragor o wybodaeth ewch i:
https://llyw.cymru/cartrefi-i-wcrain-canllawiau-i-noddwyr-html