Bydd gwasanaeth Safonau Masnach Cyngor Sir Ddinbych yn gwirio pwysau carafanau a faniau gwersylla a rhoi cyngor diogelwch am ddim.
Drwy bartneriaeth â Safonau Masnach Conwy, gall trigolion sy’n bwriadu mynd ar wyliau mewn carafán neu fan wersylla gael gwiriad am ddim er mwyn sicrhau nad ydynt yn gorlwytho eu cerbydau a rhoi eu hunain mewn perygl.
Bydd swyddog o adain Diogelwch Cymunedol Heddlu Gogledd Cymru wrth law i roi cyngor ymarferol ynglŷn â chadw’ch car a’ch carafán yn ddiogel.
Y bwriad yw cynghori pobl, ac ni fydd neb yn wynebu unrhyw gamau gweithredu os ydynt wedi gorlwytho, ond byddwn yn gweithio gyda chi i geisio ysgafnhau’r llwyth.
Gall pobl yn Sir Ddinbych a Chonwy gael gwiriadau pwysau hyn yn rhad am ddim ar y bont bwyso ar yr A525 rhwng Rhuddlan a Llanelwy ar y dyddiadau a’r amserau canlynol:
Dydd Sadwrn 17/07 – 8am - 12pm
Dydd Gwener 23/07 – 12pm - 4pm
Dydd Sadwrn 31/07 – 8am - 12pm
Dydd Mercher 11/08 – 12pm - 4pm
Dydd Gwener 27/08 – 9am - 2pm
Dydd Gwener 10/09 – 9am - 2pm
Dydd Gwener 24/09 – 9am - 2pm
Nid oes rhaid ichi wneud apwyntiad, dim ond dod i’r bont bwyso ar un o’r dyddiadau uchod i weld a yw pwysau’ch cerbyd o fewn y terfynau cyfreithiol.
Fe ddewch chi o hyd i’r bont bwyso ar ffordd yr A525 rhwng Rhuddlan a Llanelwy, tua thri chwarter milltir o Ruddlan, mewn cilfan, a bydd arwyddion i ddweud a yw’r bont ar agor.