Cefnogaeth i blant sy’n dechrau yn y meithrin: Datblygiad corfforol

Mae datblygiad corfforol yn helpu plant fagu cryfder, cydsymud, cydbwysedd a hyder wrth iddynt dyfu. Mae bod yn actif bob dydd yn cefnogi datblygiad iach ac yn helpu plant ddysgu sgiliau symud pwysig drwy chwarae, archwilio a gweithgareddau bob dydd. Boed hynny’n rhedeg, dringo, dawnsio neu gymryd rhan mewn chwarae yn yr awyr agored, mae llawer o ffyrdd hwyliog o annog plant i fod yn actif.

Pam bod datblygiad corfforol yn bwysig

Mae datblygiad corfforol yn sylfaen hanfodol i iechyd, dysg a lles plentyn drwy gydol ei oes.

Mae chwarae actif, maeth iach ac amgylcheddau cefnogol yn helpu plant:

• fagu cryfder, cydsymud a sgiliau symud
• datblygu hyder ac annibyniaeth
• gwella les a pharodrwydd i ddysgu
• sefydlu arferion iach sy’n gallu para oes
• cyflawni eu llawn botensial.

Chwarae actif a symud

Mae chwarae rheolaidd yn hanfodol i ddatblygu sgiliau corfforol a chefnogi datblygiad cyffredinol. Dylai plant gael cyfleoedd dyddiol i archwilio, symud, dringo, rhedeg, cadw cydbwysedd a chwarae y tu mewn a thu allan.

Sgiliau echddygol bras

Mae sgiliau echddygol bras yn golygu defnyddio’r cyhyrau mawr ar gyfer gweithgareddau fel cropian, cerdded, rhedeg, neidio a dringo. Mae chwarae actif yn cryfhau sgiliau cydsymud, cryfder craidd ac ymwybyddiaeth o le.

Sgiliau echddygol manwl

Mae datblygiad echddygol manwl yn canolbwyntio ar gyhyrau bach y dwylo a’r bysedd. Datblygir sgiliau hanfodol bob dydd megis gafael mewn pethau, defnyddio cyllyll a ffyrc, darlunio ac ysgrifennu cynnar yn naturiol drwy weithgareddau ymarferol a chwarae dyddiol.

Llythrennedd corfforol

Mae meithrin llythrennedd corfforol yn golygu helpu plant ennill hyder, ysgogiad a sgiliau i fwynhau symud fel rhan o fywyd bob dydd.  I fabanod, mae gweithgareddau fel amser ar eu boliau dan oruchwyliaeth yn cefnogi cryfder cynnar.  I blant hŷn, mae’n golygu gwneud chwarae actif yn rhan naturiol, hwyliog o’r dydd.

Twf a maeth iach

Mae maeth da ac yfed digon yn hanfodol i iechyd, twf a datblygiad plentyn. Mae helpu plant i ddatblygu arferion bwyta ac yfed iach pan maen nhw’n ifanc yn cefnogi twf cyson, cynnal pwysau iach a hyrwyddo iechyd y geg da.

Mae cyfuno chwarae actif â bwyd iach yn helpu plant deimlo ar eu gorau, yn sefydlu arferion gwych a ffynnu yn y cartref ac yn yr ysgol.

Rhaglen Plant Iach Cymru

Mae Rhaglen Plant Iach Cymru yn helpu gweithwyr proffesiynol iechyd fonitro twf a datblygiad plant drwy gysylltiadau ac asesiadau iechyd rheolaidd.

Mae cael cyswllt rheolaidd yn sicrhau bod plant a theuluoedd yn gallu cael gafael ar y gefnogaeth gywir cyn gynted ag y bydd unrhyw bryderon yn codi am eu datblygiad.

I gael rhagor o wybodaeth ewch i wefan Llywodraeth Cymru: Rhaglen Plant Iach Cymru (gwefan allanol)