Cyflwyniad
Mae Cyngor Sir Ddinbych yn falch o fod wedi cadarnhau £19.97 miliwn o Rownd 3 o gyn Raglen Ariannu Cronfa Ffyniant Bro Llywodraeth y DU i gefnogi datblygiad 7 prosiect gyda’r bwriad o wella balchder bro a gwella’r amgylchedd. Mae’r arian a sicrhawyd wedi’i ddyrannu ar gyfer y 7 prosiect llwyddiannus hyn yn unig ac nid oes modd eu trosglwyddo i brosiectau neu wasanaethau eraill.
Bu i Gyngor Sir Ddinbych gyflwyno ceisiadau ar gyfer pob un o’r 3 ardal etholaeth a oedd ar waith yn y Sir ar yr adeg hon (bu i’r ardaloedd etholaeth newid yn ystod 2024). Cafodd y prosiectau i’w cynnwys yn y cais eu cyflwyno gan Gynghorwyr Sir, Aelodau Seneddol, Cynghorau Dinas, Tref a Chymuned a swyddogion ar draws Sir Ddinbych gyda chymeradwyaeth derfynol gan Gabinet y Cyngor. Gellir dod o hyd i fwy o wybodaeth am gefndir y cyllid ar wefan y Cyngor.
Mae tair prif elfen i’r rhaglen hon a ariennir gan Lywodraeth y DU. Bydd y cyntaf yn canolbwyntio ar wella canol tref Y Rhyl drwy wneud gwelliannau i’r parth cyhoeddus a chynyddu’r ymdeimlad o le a diogelwch. Mae’r ail elfen yn canolbwyntio ar baratoi safle hen Ysbyty Gogledd Cymru ar gyfer camau’r prosiect datblygu yn y dyfodol. I gloi, bydd y drydedd elfen yn gwella’r parth cyhoeddus yng nghanol tref Prestatyn ac mae’n cynnwys rhoi pwrpas newydd i’r daith natur.
Y Prosiectau
Parth Cyhoeddus Canol Tref Y Rhyl
Cynllun o welliannau i adfywio’r parth cyhoeddus a chreu gwell cysylltiad rhwng canol y dref a’r traeth.
Promenâd Canolog Y Rhyl
Gwella’r parth cyhoeddus a’r priffyrdd i wella hygyrchedd a chreu gwell cysylltiad rhwng y promenâd a chanol y dref.
Parc Poced Parth Y Rhyl
Tynnu adeiladau anniogel yn 123-131 Stryd Fawr a darparu gofod gwyrdd croesawgar ac ardaloedd eistedd, sy’n hygyrch i bawb.
Parth Cyhoeddus Marchnad y Frenhines Y Rhyl
Gwelliannau i gefnogi cynnig Marchnad y Frenhines Y Rhyl.
Hen Ysbyty Gogledd Cymru Dinbych
Cynllun i ddymchwel rhannau anniogel a diogelu gweddill yr adeilad rhestredig Gradd II er mwyn gallu cyflawni gwaith datblygu sector preifat.
Stryd Fawr Prestatyn
Gwella’r parth cyhoeddus ac isadeiledd gwyrdd ar y brif stryd fawr i wella hygyrchedd canol y dref.
Parc Natur Morfa Prestatyn
Darparu lle tawel i gerdded o amgylch y gwlyptir, gwella’r llwybr i gerddwyr a beicwyr trwy ei gysylltu â’r llwybrau eraill sydd eisoes wedi’u sefydlu.
Y Sefyllfa Bresennol
Mae’r holl brosiectau yn y cam dylunio a datblygu ar hyn o bryd gyda gwaith dichonoldeb a thirfesur bellach yn dechrau. Mae rhywfaint o oedi wedi bod i gymeradwyo’r arian yn ffurfiol oherwydd y newid yn y Llywodraeth yr haf diwethaf. Fodd bynnag, mae cymeradwyaeth derfynol ar gyfer y grant bellach wedi’i derbyn ac mae gwaith yn parhau i ffurfio timau prosiect a symud ymlaen gyda dyluniadau a datblygu’r prosiect.
Mae’r prosiectau ar gamau amrywiol o barodrwydd gyda’r rhan fwyaf ymhell o fod yn barod ar gyfer gwneud gwaith adeiladu. Wrth i gynlluniau cyflawni gael eu datblygu ar gyfer pob un o’r prosiectau, bydd mwy o wybodaeth ar gael i’ch cynghori o ran amserlenni.
Yn Y Rhyl a Phrestatyn, disgwylir y bydd ymgysylltu ac ymgynghori â’r cyhoedd yn digwydd yn nes ymlaen eleni ar gyfer rhai o’r prosiectau mwy. Bydd cyfleoedd i weld y dyluniadau ac i gael dweud eich dweud yn cael eu hyrwyddo drwy safleoedd cyfryngau cymdeithasol y Cyngor, trwy ddatganiadau i’r wasg a’n newyddlen. Cofrestrwch ar gyfer y newyddlen a fydd yn cael ei hanfon yn uniongyrchol i’ch mewnflwch i gael y newyddion diweddaraf.
Rydym yn deall efallai y bydd gan fusnesau a phreswylwyr bryderon am effaith yr adeiladu, yn arbennig lle mae gennym ni nifer o brosiectau’n agos. Wrth i brosiectau gael eu datblygu, bydd unrhyw effeithiau posibl y gwaith adeiladu yn cael ei nodi a bydd camau’n cael eu cymryd pryd bynnag fo’n bosibl i leihau unrhyw darfu i fusnesau a phreswylwyr – bydd rhagor o wybodaeth yn cael ei ddosbarthu fel y daw i law.
Newyddlenni'r Dyfodol
Os oes gennych ddiddordeb mewn derbyn newyddlenni dros e-bost yn y dyfodol sy’n rhoi’r wybodaeth ddiweddaraf am y prosiectau sy’n cael eu cyflawni fel rhan o raglen a ariennir gan Lywodraeth y DU ar gyfer Dyffryn Clwyd,
gallwch gofrestru i’n rhestr bostio drwy fynd i wefan.
Os oes gennych chi ragor o gwestiynau, cysylltwch â’r tîm: ffyniantbro@sirddinbych.gov.uk.