Caniatâd i ddefnyddio tir ar gyfer masnachu ar y stryd
Mae’n rhaid i fasnachwyr ar y stryd gael caniatâd ysgrifenedig gan berchennog tir cyn y gallwn roi caniatâd masnachu ar y stryd.
Pwy i gysylltu â nhw
Bydd pwy i gysylltu â nhw i gael caniatâd yn dibynnu ar y math o dir, p’un a yw’n eiddo i’r cyngor, yn rhan o briffordd sydd wedi’i mabwysiadu neu’n dir preifat.
Tir sy’n eiddo i Gyngor Sir Ddinbych
Gallwch anfon neges e-bost at ein tîm Prisio ac Ystadau i ofyn am ganiatâd i fasnachu ar dir sy’n eiddo i Gyngor Sir Ddinbych.
Priffyrdd sydd wedi’u mabwysiadu
I fasnachu ar briffyrdd sydd wedi’u mabwysiadu, megis y prif strydoedd yn Y Rhyl neu Ruthun, anfonwch neges e-bost at ein tîm Priffyrdd.
Tir preifat
Ar gyfer tir preifat, bydd angen i chi gysylltu â pherchennog y tir yn uniongyrchol am ganiatâd. Ni allwn ddarparu manylion perchennog y tir preifat.
Unwaith y byddwn yn derbyn cais, byddwn yn asesu p’un a yw’r safle yn addas.
Ni roddir caniatâd i fasnachu ar y stryd os yw’r gweithgaredd:
- yn effeithio ar ddiogelwch ffyrdd
- yn achosi sŵn, sbwriel, mygdarth, perygl o fermin, neu golli amwynder
- yn debyg i fasnach sydd eisoes yn bodoli gerllaw
- yn gwrthdaro â thraffig / cyfyngiadau aros
- yn rhwystro mynediad i gerddwyr neu gerbydau
- yn amharu ar linellau gwelededd neu lif traffig
- heb fannau parcio / llwybrau diogel i fasnachwyr a chwsmeriaid
- yn digwydd wedi iddi nosi ac yn anniogel heb oleuadau
Dirwyon a chosbau
Gellir cymryd camau gorfodi os bydd rhywun yn:
- masnachu heb ganiatâd i fasnachu ar y stryd neu’r drwydded ofynnol
- masnachu ar stryd ble mae masnachu wedi’i wahardd
- peidio â chadw at amodau eu caniatâd masnachu ar y stryd
Gall camau gorfodi gynnwys:
- atal neu dynnu’r caniatâd i fasnachu ar y stryd neu’r drwydded ofynnol yn ôl
- dirwyon hyd at £1,000