Prosiectau Cronfa Ffyniant Gyffredin y DU: Cymunedau a Natur - Croeso Cynaliadwy i Ymwelwyr

Arweinydd y Prosiect: Cyngor Sir Ddinbych

Trosolwg o’r prosiect

Bydd y prosiect hwn yn darparu Ceidwaid mewn nifer o safleoedd ymwelwyr allweddol ledled Sir Ddinbych mewn ymateb i gynnydd sylweddol mewn ymwelwyr yn yr ardaloedd hyn.

Bydd y ceidwaid yn darparu cyngor ac arweiniad cadarnhaol i ymwelwyr yn ogystal â helpu i leihau tagfeydd ac effeithiau negyddol niferoedd uchel o ymwelwyr ar y gymuned leol a gwella profiad ymwelwyr.

Bydd y prosiect hefyd yn datblygu a hyfforddi Ceidwaid gwirfoddol a fydd yn cyfrannu at groesawu ymwelwyr mewn safleoedd allweddol a darparu help a chymorth i ymwelwyr.

Diweddariad y prosiect

Crynodeb olaf y prosiect (Blwyddyn Drosiannol 2025–26)

Mae Ceidwaid sy’n gwirfoddoli wedi parhau i ddatblygu eu sgiliau hwsmonaeth anifeiliaid wrth gyflwyno ymgyrchoedd i hyrwyddo perchnogaeth cŵn cyfrifol.

Gan weithio ochr yn ochr â’r Ceidwaid, bu iddynt gefnogi pori cadwraeth gan ddefnyddio merlod cynhennid y Carneddau, gan helpu i addysgu ymwelwyr ynglŷn â rheoli cynefin a’r angen i gadw cŵn o dan reolaeth i amddiffyn bywyd gwyllt sensitif.

Bu iddynt hefyd arwain ymgyrchoedd ymwybyddiaeth ym Mharc Gwledig Loggerheads a Moel Famau, gan ymdrin â materion megis baw cŵn, effeithiau ar dda byw ac adar sy’n nythu, a hyrwyddo deddfwriaeth newydd. Roedd y gweithgareddau hyn yn cryfhau ymgysylltu â’r gymuned, yn annog ymddygiad cyfrifol ac yn sicrhau bod ymwelwyr yn teimlo eu bod yn cael eu cefnogi a’u bod yn wybodus.

Hefyd, bu i’r Ceidwaid Gwirfoddol gyfrannu at reolaeth safle trwy ostwng sbwriel, ymgysylltu ag ymwelwyr, a chefnogi mynediad cynaliadwy. Roeddent yn cymryd rhan mewn mentrau ehangach megis Wythnos Awyr Dywyll ac yn aros mewn cysylltiad trwy rwydwaith ar y cyd, gan ganiatáu iddynt ddweud ynglŷn â phroblemau, rhannu gwybodaeth, a chefnogi ei gilydd.

Bu i’r rhaglen gwirfoddolwyr cadwraeth barhau trwy gydol y gaeaf ac i’r gwanwyn, gan gynnwys gwirfoddolwyr mewn ystod o welliannau ymarferol. Roedd hyn yn cynnwys cynnal a chadw llwybrau i wella hygyrchedd, symud rhywogaethau goresgynnol, a sgiliau traddodiadol megis ffensys hollt a phlethu gwrychoedd. Mae’r gweithgareddau hyn yn gwella bioamrywiaeth, yn cynnal treftadaeth ddiwylliannol, ac yn darparu buddion iechyd a lles gwerthfawr i wirfoddolwyr.

Crynodeb y prosiect - mis Rhagfyr 2022 i fis Mawrth 2025

Roedd y prosiect hwn yn canolbwyntio ar sefydlu rhwydwaith ceidwaid gwirfoddol mewn ardaloedd AHNE yn Sir Ddinbych.

Darparodd dros 28,000m² o barthau cyhoeddus gwell a 323 o gyfleoedd gwirfoddoli, gan helpu i leihau ymddygiad gwrthgymdeithasol a gwella profiad ymwelwyr.