Ymchwiliadau paranormal yn Nantclwyd y Dre
Dewch i ymchwilio i ganrifoedd o hanes yn Nantclwyd y Dre, tŷ tref rhestredig Gradd I hynod ddiddorol. Adeiladwyd yr adeilad unigryw hwn ym 1435 yn ystod y gwaith o ailadeiladu Rhuthun yn dilyn gwrthryfel Owain Glyndŵr. Ers hynny fe’i defnyddiwyd fel trigfan gwehydd, ysgol i ferched, llety i farnwyr, a chartref teuluol i nifer o gymeriadau dylanwadol.
Heddiw, mae ei ystafelloedd wedi eu hadfer yn hardd, ac mae’n cynnig siwrnai lle gall rhywun ymgolli mewn bron i 600 mlynedd o hanes. Gall ymwelwyr gamu i wahanol gyfnodau, gan grwydro o neuadd ganoloesol drawiadol ac ystafelloedd Jacobeaidd â fframiau pren, i drigfan Sioraidd gain ac ysgoldy Fictoraidd bywiog. Mae’r llinell amser yn ymestyn trwy’r oes Edwardaidd, y 1920au ffasiynol, a dyddiau dirdynnol yr Ail Ryfel Byd, gan gwblhau yn y cyfnod wedi’r rhyfel. Daw storïau’r tŷ yn fyw, gan roi profiadau cyfareddol i ymwelwyr a’u cysylltu â’r gorffennol.
Mae’r hanes cyfoethog hwn yn gosod llwyfan berffaith ar gyfer ymchwiliad bythgofiadwy. Mae potensial anhygoel i’r lleoliad ar gyfer helwyr ysbrydion.
Yn ystod ymchwiliadau blaenorol, cafwyd adroddiadau o weld ysbryd corff llawn ynghyd â gweithgarwch poltergeist. Mae helfeydd ysbrydion enwog wedi eu cynnal yn Nantclwyd y Dre hefyd, gan gynnwys ymweliad yn 2018 yn ymwneud â’r “ddol Grace” cyn iddi gael ei symud i gasgliad preifat.
Argaeledd
Cynigir ymchwiliadau paranormal ar nos Wener a nos Sadwrn fel arfer, rhwng 5pm ac 11pm (gan gynnwys gosod a chadw unrhyw offer), ond mae’n bosibl y bydd modd gwneud trefniadau ar gyfer nosweithiau eraill yr wythnos.
Sylwer os gwelwch yn dda, yn sgil staffio a rheoliadau iechyd a diogelwch, 30 yw’r nifer uchaf o bobl y gallwn eu derbyn ar unwaith.
Arlwyo
Mae yrnau dŵr poeth ar gael. Dylai bwyd a diod gael eu bwyta ac yfed yn yr ardaloedd dynodedig yn unig. Ni chaniateir yfed alcohol.
Prisiau
Pris cynnal ymchwiliad paranormal yn Nantclwyd y Dre yw £650 (ni chodir TAW).
Gofynnir am flaendal o 50%, sef £325, o fewn 5 diwrnod gwaith i sicrhau unrhyw archeb, ac mae’n rhaid talu’r balans llawn bedair wythnos cyn y digwyddiad.
Sut i archebu
Os hoffech chi archebu, trafod eich gofynion, neu drefnu ymweliad i weld a oes gennym le a fyddai’n addas i chi, cysylltwch â ni.
Cyfryngau cymdeithasol